"სხვადასხვა მიზეზების გამო, მასთან ურთიერთობა არ მაქვს" - ხიდაშელი მის ძმაზე გავრცელებულ ინფორმაციას "ფეისბუქზე" ეხმაურება

თავდაცვის ყოფილი მინისტრი თინა ხიდაშელი მის ძმასთან დაკავშირებით ზვიად კუპრავას მიერ გაკეთებულ განცხადებას "ფეისბუქზე" ეხმაურება:

"ბევრმა ადამიანმა მომწერა კუპრავას განცხადებაზე. მოკლე კომენტარი:1. არაფერი ვიცი იმაზე რასაც ამბობს. 2. სხვადასხვა მიზეზის გამო, პრაქტიკულად არ მაქვს მიშასთან (ანუ ჩემს ძმასთან) ურთიერთობა. 3. ვერ ვხედავ ვიდეოში რა ხდება და ამიტომ არ ვიცი ის არის თუ არა გადაღებული. უბრალოდ არ ჩანს თორემ მამა ერთი გვყავდა და ამოვიცნობდი აუცილებლად :) 4. აქვე ინფორმაციისთვის, სუსში არასოდეს უმუშავია, და პოლიციიდან ოქრუაშვილის მინისტრობის დროს გაათავისუფლეს.5. ზოგადად, მე თუ მკითხვათ, მე მის სიტყვებს დიდ მნიშვნელობას არ ვანიჭებ. 6. მედიის საყურადღებოდ, ტელეფონის ნომერი არ ვიცი" - წერს ხიდაშელი.

ზვიად კუპრავამ ერთ-ერთი ტელეკომპანიის ეთერში განაცხადა, რომ მას მიხეილ ხიდაშელმა, რომელიც სუს-ის ყოფილი მაღალჩინოსანია, აქციაზე მოსალოდნელი პროვოკაციების შესახებ ინფორმაცია მიაწოდა.

"მე ვთხოვ გახარიას, რომ დაიბაროს დაუყოვნებლივ დაკითხვაზე ხიდაშელის ძმა, რადგან ამ პიროვნებას პროვოკაციებთან დაკავშირებით აქვს მნიშვნელოვანი ინფორმაციები," - განაცხადა კუპრავამ.

აქციის ერთ-ერთი ორგანიზატორის მიერ გავრცელებული ინფორმაციის შემდეგ მიხეილ ხიდაშელი შსს-ში გამოკითხვაზეა დაბარებული.