10 მიზეზი, რის გამოც წულუკიანი უნდა გადადგეს - მოქალაქეები მინისტრის გადადგომას დღეს აქციაზე მოითხოვენ
იუსტიციის სახლთან დღეს, იუსტიციის მინისტრ თეა წულუკიანის გადადგომის მოთხოვნით აქცია გაიმართება. აქციის მონაწილეები ასევე მოითხოვენ, ახალი, საზოგადოების ნდობით აღჭურვილი პროკურორობის კანდიდატები ახალმა იუსტიციის მინისტრმა, ფართო საზოგადოებრივი ჩართულობის და კონსენსუსის შედეგად შეარჩიოს.
#გადადგესწულუკიანი ამ ჰეშთეგით "ფეისბუქში" უამრავი ადამიანი გაერთიანდა, რომლებიც აქციაზე მისვლას და წულუკიანის გადადგომის მოთხოვნას აპირებენ. სოციალურ ქსელში დაგეგმილ აქციაზე უკვე რამდენიმე ასეული ადამიანი აპირებს წასვლას. აქციის ორგანიზატორები სამოქალაქო აქტივისტები არიან, რომლებიც მინისტრის გადადგომის მოთხოვნას შემდეგი არგუმენტებით ამყარებენ:
"დაუყოვნებლივ გადადგეს თეა წულუკიანი და ახალი, საზოგადოების ნდობით აღჭურვილი პროკურორობის კანდიდატები წარადგინოს ახალმა იუსტიციის მინისტრმა, ფართო საზოგადოებრივი ჩართულობის და კონსესუსის შედეგად!
➡️ იუსტიციის მინისტრი არის პერსონალურად პასუხისმგებელი სასამართლო სისტემის რეფორმაზე, რომელიც არ განხორციელდა
➡️ იუსტიციის მინისტრმა არ იზრუნა დამოუკიდებელი საგამოძიებო ორგანოს ჩამოყალიბებაზე, რომელიც გამოიძიებდა სამართალდამცველთა მიერ ჩადენილ დანაშაულებს
➡️ იუსტიციის მინისტრმა მთავარ პროკურორ შოთაძეს მადლობა გადაუხადა კარგად შესრულებული საქმიანობისთვის მისი გადადგომის შემდეგ
➡️ იუსტიციის მინისტრის მიერ შერჩეულმა ოთხიდან ვერც ერთმა მთავარმა პროკურორმა ვერ იმუშავა დამოუკიდებლად
➡️ თეა წულუკიანი არ აღიარებს და პატივს არ სცემს სასამართლო ხელისუფლებას! ის არ აღასრულებს სასამართლოს გადაწყვეტილებებს გახმაურებულ საქმეებზე, იყენებს ინსტიტუციურ მექანიზმებს პირადი მიზნებისთვის, უკანონოდ ათავისუფლებს თანამშრომლებს სამსახურიდან
➡️ იუსტიციის მინისტრმა არამიზნობრივად გაზარდა საშტატო ერთეულთა რაოდენობა იუსტიციის სისტემაში და პარტიული აქტივისტებით გაავსო სამინისტრო
➡️ თეა წულუკიანს არ აქვს იურისტის დიპლომი
➡️ სტრასბურგმა ორჯერ დაუწუნა მოსამართლეთა სია
➡️ წაგებული აქვს თითქმის ყველა საქმე საერთაშორისო დონეზე
➡️ იუსტიციის მინისტრს უნდობლობა გამოუცხადა არასამთავრობო სექტორმა;
იმისათვის, რომ აღდგეს პროკურატურისადმი ნდობა, აუცილებელია, მთავარ პროკურორად შეირჩეს პირი, რომელიც არ არის აფილირებული მმართველ პარტიასთან და სარგებლობს მაღალი საზოგადოებრივი ნდობით.
ზემოთ ჩამოთვლილი მიზეზების გამო, დარწმუნებულები ვართ, რომ თეა წულუკიანი ვერ შეარჩევს დამოუკიდებელ პროკურორს, სწორედ ამიტომ, ვითხოვთ იუსტიციის მინისტრის დაუყოვნებლივ გადადგომას და ახალი იუსტიციის მინისტრის შერჩევას სამოქალაქო საზოგადოებრივი კონსესუსის შედეგად, მისი წინამორბედის შეცდომებისა და ნაკლოვანებების გათვალისწინებით.
აქციის ორგანიზატორები ვართ მოქალაქეები #მეთავისუფლებისთვის, შემოგვიერთდით თუ იზიარებთ ჩვენს მოთხოვნებს" - ნათქვამია აქციის ორგანიზატორების მიმართვაში.
LIVE: ალეკო ელისაშვილი და გიორგი ვაშაძე "ნიუსრუმში"
ანტიკვარული ჭაღები, ხალიჩები და საათები - რამდენი დახარჯა სალომე ზურაბიშვილმა რეზიდენციის მოსაწყობად
