მიხეილ სააკაშვილი ჯონ მაკკეინის გარდაცვალებას ეხმაურება

ჯონ მაკკეინი იყო საქართველოს ეროვნული გმირი, - ამის შესახებ საქართველოს ყოფილმა პრეზიდენტმა მიხეილ სააკაშვილმა ამერიკელი სენატორის, ჯონ მაკკეინის გარდაცვალების შესახებ გავრცელებულ ვიდეომიმართვაში განაცხადა.

მიხეილ სააკაშვილის თქმით, ჯონ მაკკეინი იყო ყველაზე დიდი მეგობარი, რომელიც ოდესმე ჰყოლია საქართველოს დასავლეთში.

"ჯონ მაკკეინი იყო ყველაზე დიდი მეგობარი, რომელიც ოდესმე ჰყოლია საქართველოს დასავლეთში და საერთოდ, მსოფლიოში. მაკკეინი იყო ყველაზე დიდი მეგობარი, რომელიც ოდესმე მყოლია მე ცხოვრებაში. ეს არის წარმოუდგენელი დანაკარგი საქართველოსთვის და ძლიან მძიმე დანაკარგი მსოფლიოსთვის.

მე ვფიქრობ, ჩვენ ყველამ უნდა მივაგოთ პატივი მის ხსოვნას და გავიხსენოთ, რომ ის იყო საქართველოს ეროვნული გმირი, არა მხოლოდ ამერიკის ეროვნული გმირი. რატომ იყო საქართველოს ეროვნული გმირი? იმიტომ, რომ ყველა გადამწყვეტ მომენტში, ყველაზე ისეთ დროს, როდესაც გვჭირდებოდა, ყოველთვის იდგა ჩვენი ერის გვერდზე, ყოველთვის გადაგვეფარა, გაგვიმართა ხელი და ყოველთვის ბოლომდე დაგვიჭირა მხარი.

ჩვენს მრავალათასწლოვან ისტორიაში, ძალიან ცოტა არის ასეთი ფაქტები. ეს იყო მართლაც ძალიან დიდი მოღვაწე. ჩვენთვის, ყველასთვის არის დიდი პატივი, რომ მის ეპოქაში ვცხოვრობდით. ჩვენ ბოლომდე უნდა მივიყვანოთ მისი საქმე და მისი საქმის ბოლომდე მიყვანა ასევე იქნება საქართველოს გამარჯვება, გამთლიანება საბოლოო გათავისუფლება, ქართველი ერის საბოლოოდ ფეხზე წამოდგომა, საქართველოს ბევრად უკეთესი, ბევრად უფრო უზრუნველყოფილი მშვიდობიანი მომავალი. ამის სჯეროდა ჯონ მაკკეინს და ჩვენ ამას აუცილებლად ერთად შევასრულებთ" - განაცხადა მიხეილ სააკაშვილმა.

ამერიკელი სენატორი, ვიეტნამის ომის გმირი ჯონ მაკკეინი 81 წლის ასაკში გარდაიცვალა. როგორც მისი ოჯახის მიერ გავრცელებულ მოკლე განცხადებაშია აღნიშნული, ჯონ მაკკეინი შაბათს დაიღუპა.

სენატორი 2017 წლის ივლისიდან უმძიმეს დაავადებას - ტვინის სიმსივნეს ებრძოდა და იმ პერიოდიდან მოყოლებული მკურნალობის კურსს გადიოდა.

ოჯახის ინფორმაციით, სენატორმა მისივე გადაწყვეტილებით, პარასკევიდან მკურნალობა შეწყვიტა.