მეგანმა ლურჯი კაბით სოციალური ქსელები აღაფრთოვანა - სასექსის ჰერცოგი და ჰერცოგინია საქველმოქმედო კონცერტზე

პრინცი ჰარი და მეგან მარკლი ლონდონში საქველმოქმედო კონცერტს დაესწრნენ, რომელიც პირველი მსოფლიო ომის დამთავრებიდან 100 წლისთავის აღსანიშნავად გაიმართა. ღონისძიებიდან შემოსული თანხა იმ საქველმოქმედო ორგანიზაციებს გადაეცემათ, რომლებსაც ბრიტანეთის სამეფო ოჯახი ეხმარება. ჰარი და მეგანი კონცერტის საპატიო სტუმრები იყვნენ.

მარკლი მანქანიდან "ვესტმინსტერ სენტრალ ჰოლის" შესასვლელთან გადმოვიდა, მას ჯეისონ ვუს ლურჯი კაბა და Aquazzura-ს ფეხსაცმელი ეცვა.

სასექსის ჰერცოგმა და ჰერცოგინიამ საკუთარი ადგილები დარბაზში მალევე დაიკავეს, რომ სხვა სტუმრები არ შეეფერხებინათ, მუსიკოსებს, საქველმოქმედო ორგანიზაციების წარმომადგენლებს და პოტენციურ სპონსორებს კი შესვენების დროს გაესაუბრნენ.

სოციალური ქსელების მომხმარებლების დიდი ნაწილი მეგანის გარეგნობითა და ჩაცმულობით ამჯერადაც აღფრთოვანდა. "ტვიტერზე" წერენ, რომ ჰერცოგინია ყოველთვის ახერხებს, შეუდარებლად გამოიყურებოდეს.