"სამწუხაროდ, ობიექტურ გარემოებათა გამო, ხორავას ქუჩის საქმის სათანადოდ გახსნა ვერ მოხერხდა" - კობახიძე

სამწუხაროდ, ამ რეალობაში ობიექტურ გარემოებათა გამო, ხორავას ქუჩის საქმის სათანადოდ გახსნა ვერ მოხერხდა, - ამის შესახებ პარლამენტის თავმჯდომარემ ირაკლი კობახიძემ ტელეკომპანია „იმედის“ ეთერში განაცხადა. ამით პარლამენტის თავმჯდომარემ ჟურნალისტის კითხვას უპასუხა, რომელიც მკვლელობაში მონაწილე ყველა პირის იდენტიფიცირებას უკავშირდებოდა.

„ხორავას ქუჩის საქმეში ობიექტური პრობლემა არსებობდა და ამაზე გვქონდა საუბარი შინაგან საქმეთა სამინისტროსთან და პროკურატურასთან. არ თანამშრომლობენ კონკრეტული პირები გამოძიებასთან. ის დრო წავიდა, როდესაც თქვენ იცით რა მეთოდებითაც ხდებოდა ჩვენებების მიღება ადამიანებისგან. რა თქმა უნდა, მინუსები აქვს იმას, რომ ჩვენების მიღებისათვის უხეშ მეთოდებს არ ვიყენებთ, მაგრამ ჩვენი მთავარი მიღწევა ის არის, რომ ადამიანის უფლებები არის დაცული. სამწუხაროდ, ამ რეალობაში ობიექტურ გარემოებათა გამო ვერ მოხერხდა საქმის სათანადოდ გახსნა. ეს არის სამწუხარო რეალობა“, - განაცხადა ირაკლი კობახიძემ.

მისივე თქმით, ხორავას ქუჩის საქმესთან დაკავშირებულ აქციებს, რომელიც ორშაბათიდან იგეგმება, პოლიტიკური ფონი აქვს.

„ვხედავთ, რომ იმ აქციებს, რომელიც ორშაბათიდან უნდა დაიწყოს, „ნაციონალური მოძრაობა“ ამზადებს. მე პირდაპირ შემიძლია ვთქვა, რომ „ნაციონალური მოძრაობის“ არც ერთ აქციას არ აქვს წარმატების პერსპექტივა. ამ საქმესთან დაკავშირებით ჭეშმარიტების დადგენის სურვილი თითოეულ ჩვენგანს აქვს, მაგრამ რაც შეეხება ამ აქციების პოლიტიკურ ფონს, ეს ყველასთვის ნათელია. ჩვენ ამ ერთი წლის განმავლობაში რამდენჯერმე ვნახეთ ნიკა გვარამიას გაფითრებული სახე და კიდევ ერთხელ ვნახავთ ამ სახეს უახლოეს მომავალში. ჩვენთვის მთავარია ჭეშმარიტების დადგენა, მაგრამ აშკარად არსებობს ობიექტური გარემოებები, რომლებიც ხელს უშლის ჭეშმარიტების დადგენას. ამის მიუხედავად, ჩვენ გვაქვს იმედი, რომ გამოძიების კვალდაკვალ მაინც მოხერხდება ამ საქმეზე სრულად ნათელის მოფენა,“ - განაცხადა ირაკლი კობახიძემ.

შეგახსენებთ, რომ ხორავას ქუჩაზე მოკლული მოზარდის დავით სარალიძის მამა, ზაზა სარალიძე 10 სექტემბრიდან აქციების დაწყებას აანონსებს.