ობობებმა საბერძნეთში მთელი პლაჟი ქსელით დაფარეს

საბერძნეთის ერთ-ერთი პლაჟი არაქნოფობებისთვის ყველაზე დიდ კოშმარად გადაიქცა - სანაპიროზე ობობებმა 300 მეტრი სიგრძის ქსელი გააბეს.

ვიდეოზე, რომელიც „იუთუბზე“ ჯიანის ჯიანაკოპულოსმა ატვირთა, ჩანს ქალაქ აიტოლიკოს პლაჟი, რომელიც სქელი ქსელით არის დაფარული.

როგორც გაირკვა, აბლაბუდა პლაჟზე ტეტრაგნატას გვარის ობობებმა გააბეს.

ბიოლოგმა მარია ჩატზაკიმ ბერძნულ მედიას განუცხადა, რომ ობობის ეს სახეობა ადამიანის სიცოცხლეს საფრთხეს არ უქმნის. მისივე თქმით, ახლა ობობების დაწყვილების პერიოდია. ასეთივე შემთხვევა, ბიოლოგის თქმით, 2003 წელსაც მოხდა. ობობები დაიხოცებიან, ქსელი კი ნელ-ნელა დაიშლება.