19 წლის გოგონა კლიპში ბუსტჰალტერით გამოჩნდა და ყირგიზეთში თავის მოკვეთით ემუქრებიან

ყირგიზი მომღერალი, რომელიც კლიპში ბუსტჰალტერით გამოჩნდა, სოციალურ ქსელებში კრიტიკის ქარცეცხლში გაახვიეს. სიმღერაში „გოგონა“ 19 წლის ზერე ასილბეკი მღერის, რომ არავის აქვს უფლება ქალებსა და გოგონებს მიუთითონ, რა ჩაიცვან და როგორ გამოიყურებოდნენ.

ზერესთან ერთად კლიპში ჩანან გოგონები სხვადასხვა ჩაცმულობით - ჰიჯაბებით, ტრადიციული ყირგიზული კაბებით და საცურაო კოსტიუმებით.

ეს ზერეს პირველი სიმღერაა, რომელიც 2 თვის წინ გამოჩნდა, თუმცა მისი განხილვა კლიპის გადაღების შემდეგ დაიწყეს. ვინც მუსიკოსის აზრს იზიარებს, ფოტოებს შიდა თეთრეულით იღებს და „ფეისბუქზე“ ტვირთავს. ისინი ამბობენ, რომ პატრიარქალურ ქვეყანაში საკუთარი უფლებების დასაცავად ტანსაცმლის გახდაა საჭირო.

ნახეთ ვიდეო : 19 წლის ყირგიზ მომღერალს, ვიდეოში ბიუსტჰალტერით გამოჩენის გამო, "თავის მოჭრით" ემუქრებიან

თუმცა, სიმღერამ დიდი ნაწილის გაღიზიანება გამოიწვია და ზერეს ანგარიშსწორებით ემუქრებიან. მომღერალმა გამოაქვეყნა მუქარის ტექსტები, ერთ-ერთ მათგანში აღნიშნულია, რომ ზერეს „თავს მოაჭრიან“.

მომღერალმა განცხადება სამართალდამცავ ორგანოებშიც დაწერა, შსს-ში კი განაცხადეს, რომ ყველაფერს გააკეთებენ მის დასაცავად.

ამასთან, უფრო მეტს საუბრობენ არა სიმღერის შინაარსზე, არამედ ზერეს გარეგნობაზე. გოგონას სხეულის შესახებ კომენტარების ავტორებს შორის ქვეყნის ყოფილი პრემიერ-მინისტრი ფელიქს კულოვიც კი აღმოჩნდა, რომელმაც ზერე დაიცვა, თუმცა აღნიშნა, რომ „გოგონას ფორმა იდეალური რომ ყოფილიყო, კლიპი ასეთ აჟიოტაჟს არ გამოიწვევდა“.

ზერე კი ამბობს, რომ მიზანი მიღწეულია - მას სურდა, პროვოკაციული კლიპით საზოგადოებაში ქალების უფლებებზე საუბარი აქტიურად დაწყებულიყო.