ქალი ისე დაიღალა კითხვით "როდის თხოვდები", რომ საკუთარ თავზე დაქორწინდა

ოქსფორდის უნივერსიტეტის 32 წლის სტუდენტი ლულუ ჯემიმა იმდენად დაიღალა ოჯახის წევრების კითხვით „როდის თხოვდები?“, რომ საკუთარ თავზე დაქორწინდა.

ლულუ ამბობს, რომ დაოჯახება მისთვის ყველაზე ნაკლებად მნიშვნელოვანია, რადგან მსოფლიოს ერთ-ერთ ყველაზე პრესტიჟულ უნივერსიტეტში კრეატიული წერის სამაგისტრო კურსს გადის.

მოსაბეზრებელი კითხვებისგან რომ დაესვენა, ჯემიმამ ახლობლებს მოსაწვევები გაუგზავნა, კაბა იქირავა და „ცერემონიალზე“ საქორწინო მარშის ფონზე შევიდა. შემდეგ კი ტრადიციული სიტყვითაც გამოვიდა, რომლის დროსაც სტუმრებს აუხსნა, რატომ არ იყო ქორწილზე საქმრო.

ლულუს თქმით, მისი უგანდელი მშობლები შვილის გადაწყვეტილებით უკმაყოფილოები არიან, თუმცა თავად სასწავლო პროცესით ბედნიერია.

„ქორწილი“ სტუდენტს სულ 2 ფუნტი დაუჯდა, რაც ღონისძიების ადგილამდე ტაქსიში გადაიხადა. დანარჩენი ხარჯები კი მეგობრებმა საჩუქრად გაიღეს.

„16 წლის ვიყავი, მამაჩემმა საქორწინო სიტყვა რომ დაწერა. დედაჩემი ყოველ დაბადების დღეზე ჩემს გათხოვებაზე ლოცულობდა,“ - ამბობს ლულუ, რომელიც ფრილანსერი ჟურნალისტია და ამასთან, მიგრაციის საერთაშორისო ორგანიზაციაში კომუნიკაციების კონსულტანტად მუშაობს.