რას წერს სალომე ზურაბიშვილი ძმასთან შერიგების შესახებ

სალომე ზურაბიშვილი „ფეისბუქზე“ ძმასთან შერიგების შესახებ წერს. პრეზიდენტობის კანდიდატმა საკუთარ გვერდზე ოთარ ზურაბიშვილის ვიდეო გააზიარა :

„ჩვენი შერიგება, ურთიერთპატივისცემა და სიყვარული მაგალითად დავუდოთ ხვალინდელ დამშვიდებულ საქართველოს!“ - წერს ზურაბიშვილი ვიდეოს კომენტარად.

ვიდეომიმართვაში ოთარ ზურაბიშვილი საპრეზიდენტო არჩევნებში დას მხარდაჭერას უცხადებს.

„ალბათ იცით, რომ ჩემს დას და მე გვქონდა განსხვავებული პოლიტიკური აზრები და კიდევაც გვაქვს ზოგიერთ საკითხებში, მაგრამ გვერდიგვერდ გავიზარდეთ იმ ოჯახში, სადაც სუფევდა ის მუდმივი პრინციპები, რომელსაც ჰქვია საქართველოს სუვერენიტეტი და საქართველოს დამოუკიდებლობა. ნათელი არის ორივესთვის, რომ საქართველოს ისტორიული მტერი იყო და არის რუსეთი, რომელიც დღესაც ცდილობს საქართველოს დაპყრობას. ასევე, დარწმუნებული ვარ, კრემლი იყენებს ყოველგვარ ყოფილ საბჭოთა მეთოდებს, რომ სალომეს პრეზიდენტობა აირიდოს. დღევანდელი მიუღებელი კამპანიაც არის ამის კარგი მაჩვენებელი“, - აცხადებს ოთარ ზურაბიშვილი, რომელიც დას ჯერ კიდევ რამდენიმე თვის წინ მწვავედ აკრიტიკებდა.

სექტემბერში სოციალურ ქსელში მან სტატუსი დაწერა, სადაც ამბობდა, რომ ომი საქართველოს წინააღმდეგ სწორედ რუსეთმა დაიწყო და "დიპლომატია ნამდვილი ფაქტების დამახინჯებას არ ნიშნავს".

თუმცა, ბოლო პერიოდის განმავლობაში და-ძმა ერთად არაერთხელ შენიშნეს, მათ შორის - სალომე ზურაბიშვილის შვილის, თეიმურაზ გორჯესტანის ქორწილში, სადაც ოთარ ზურაბიშვილი თამადა იყო.