სალომე ზურაბიშვილმა და გრიგოლ ვაშაძემ საკუთარი არჩევანი დააფიქსირეს

საპრეზიდენტო კანდიდატებმა - სალომე ზურაბიშვილმა და გრიგოლ ვაშაძემ საკუთარი არჩევანი უკვე დააფიქსირეს.

მმართველი გუნდის მიერ მხარდაჭერილი საპრეზიდენტო კანდიდატი, სალომე ზურაბიშვილი საარჩევნო უბანზე შვილებთან ერთად მივიდა.

"ჩემი ხმა მივეცი ყველაზე ევროპელ კანდიდატს. ეს არის ჩემი არჩევანი. ჩემი არჩევანი არის მშვიდობიანი საქართველო, ერთიანი საქართველო, დაწყნარებული საქართველო და ღიმილიანი საქართველო" - განაცხადა სალომე ზურაბიშვილმა.

გაერთიანებული ოპოზიციის საპრეზიდენტო კანდიდატმა გრიგოლ ვაშაძემ თავისი არჩევანი ქუთაისში გააკეთა. საარჩევნო უბანზე ის მეუღლესთან და შვილთან ერთად მივიდა.

„დღეს საპრეზიდენტო არჩევნების მეორე ტურია და იმედი მაქვს, რომ საქართველოს მოქალაქეები, ადამიანები, ვინც 1990-იანი წლიდან კბილებით ინარჩუნებენ დემოკრატიას, ადამიანები, ვინც ყველაფერს აკეთებენ, რომ შეინარჩუნონ სახელმწიფოებრიობა, ყველაფერს აკეთებენ, რომ ჩვენს ქვეყანაში სამ სვეტზე იყოს დაფუძნებული სახელმწიფო - თანასწორობა, სამართლიანობა, განვითარება... მოვლენ არჩევნებზე და გააკეთებენ სწორ არჩევანს, რადგან საქართველოს უაზროდ, უვიცად, ფუჭად დასახარჯი დრო მეტი არ აქვს“, - განაცხადა გრიგოლ ვაშაძემ.