რას აღნიშნავენ ებრაელები ხანუქას დღესასწაულზე?

ისრაელსა და მსოფლიოს ყველა კუთხეში ებრაელი ხალხი და მათი მეგობრები ხანუქას დღესასწაულს აღნიშნავენ. წელს ხანუქა 2 დეკემბერს დაიწყო და 9 დეკემბრის ჩათვლით გაგრძელდება. ხანუქა ებრაული დღესასწაულია, რომელიც 25 ქისლევს იწყება და 2-3 ტევეთს სრულდება.

ხანუქას დღესასწაული დაწესდა ძვ. წ. II საუკუნეში და უკავშირდება მცირერიცხოვანი მაქაბელი ებრაელების მტრის ურიცხვ ლაშქარზე გამარჯვებას, რის შემდეგაც ებრაული ტაძარი გაიწმინდა და სატაძრო მსახურება აღდგა. ეს მოხდა ჩვენს წელთაღრიცხვამდე 165 წელს.

გადმოცემის თანახმად, როდესაც ბერძნები ტაძარში შევიდნენ, იქ არსებული ზეთის მთელი მარაგი წაბილწეს. ხაშმონელების დინასტიამ ტაძარი გაათავისუფლა, მაგრამ მენორის ასანთებად არ იყო სუფთა ზეთი. ძებნის შემდეგ იპოვეს ქოენის ბეჭდით დალუქული პატარა ქოთანი - მხოლოდ ერთი დღის სამყოფი ზეთით. მოხდა სასწაული და ზეთი რვა დღეს ენთო. რვა დღის შემდეგ ახალი ქაშერი ზეთი მზად იყო...

სწორედ ამიტომ, ხანუქა სინათლის სიბნელეზე, სიკეთის ბოროტებაზე, სამართლიანობის უსამართლობაზე და მცირე ერების დიდ ერებზე გამარჯვების სიმბოლოა.

დღესასწაულის სახელწოდება წარმოსდგება გამოთქმისაგან "ხანუქათ ჰამიზბეაჰ" (სამსხვერპლოს განახლება). დღესასწაულს აქვს კიდევ ერთი სახელი - "ხაგ ურიმ", რაც ნიშნავს "ცეცხლების დღესასწაულს". ეს დასახელება პირველად იოსეფ ფლავიის წყაროებში გვხვდება.

წლებია უკვე საქართველოშიც ტრადიციად იქცა ხანუქას საზეიმოდ აღნიშვნა, ისევე როგორც ეს ხდება მსოფლიოს წამყვან, ისრაელის მეგობარ ქვეყნებში. საქართველოში ხანუქას აღნიშვნა ორი ერის - ქართველებისა და ებრაელების მეგობრობის სიმბოლოდ იქცა.