რამდენიმე საათის წინ თვითმფრინავში ბავშვი დაიბადა - "ავფრინდით 144 მგზავრით და დავეშვით 145-ით"

კონგოელმა ქალმა დღეს „თურქეთის ავიახაზების“ (Turkish Airlines) ბორტზე იმშობიარა. Daily Sabah-ის ინფორმაციით, თვითმფრინავი გაბონის დედაქალაქ ლიბრევილიდან სტამბოლში მიფრინავდა.

მუსუმბა მიჩოუკაიემბეს ფრენის დროს ძლიერი სამშობიარო ტკივილები დაეწყო, ამ დროს თვითმფრინავი უკვე 13 000 მეტრის სიმაღლეზე იმყოფებოდა. რადგანაც მშობიარობა უკვე დაწყებული იყო, მუსუმბას ქმარი, რომელიც ექიმია, ეკიპაჟთან ერთად ბავშვის მისაღებად მოემზადა, მშობიარე თვითმფრინავის უკანა ნაწილში მოათავსეს, საიდანაც მგზავრები სხვა ადგილებზე გადაანაწილეს.

დედა და ახალშობილი თავს კარგად გრძნობენ, თვითმფრინავის სტამბოლში დაჯდომისთანავე ისინი საავადმყოფოში გადაიყვანეს.

ბიჭს მშობლებმა ბენელი დაარქვეს.

მფრინავის, ალპერ აკაიას თქმით, აეროპორტში დაჯდომამდე ეკიპაჟმა სასწრაფო დახმარების ბრიგადების დახვედრა მოითხოვეს.

„ასეთი წარმატებით რომ არ მიგვეღო მშობიარობა, სხვა აეროპორტში დავსხდებოდით, თუმცა რადგან ყველაფერი კარგად დამთავრდა, 4 საათიანი მგზავრობა გეგმის მიხედვით დავასრულეთ,“ - აღნიშნა მფრინავმა.

ეკიპაჟის წევრები ხუმრობენ, რომ თვითმფრინავი ცაში აფრინდა 144 მგზავრით, მიწაზე კი 145 ადამიანით დაეშვა.