თუ ქმარი დაშორდება, ცოლს სასამართლო მესიჯს გაუგზავნის - საუდის არაბეთში ახალი კანონი ამოქმედდა

თუ საუდელი მამაკაცი გადაწყვეტს, ცოლს დაშორდეს, ქალი ამის შესახებ მოკლე ტექსტური შეტყობინების საშუალებით გაიგებს. CNN-ის ინფორმაციით, გადაწყვეტილება ქვეყნის იუსტიციის სამინისტრომ მიიღო. მიზეზად კი იქცა უამრავი შემთხვევა, როდესაც მამაკაცები ცოლებს ისე შორდებოდნენ, რომ ქალებმა ამის შესახებ არაფერი იცოდნენ.

„ქალები საუდის არაბეთში საკუთარი ოჯახური მდგომარეობის შესახებ ინფორმაციას SMS-ით მიიღებენ,“ - ნათქვამია სამეფოს იუსტიციის სამინისტროს „ტვიტერზე“.

შეტყობინებების გაგზავნა ქალებთან სასამართლოებმა გუშინ დაიწყეს. მესიჯის ტექსტში იქნება, ასევე, დაშორების ცნობის ნომერი და სასამართლოს მისამართი, სადაც ქალებს დოკუმენტების მიღების საშუალება ექნებათ.

გარდა მოკლე ტექსტური შეტყობინებებისა, ქალები ოჯახური სტატუსის შემოწმებას ვებ-გვერდზეც შეძლებენ.

ხელისუფლების ნაბიჯი იმ სოციალური და ეკონომიკური რეფორმების ნაწილია, რომელიც პრინცმა მუჰამედ ბინ სალმანმა „ხედვა 2030“ (Vision 2030) სახელით წარადგინა. რეფორმები ქალებისთვის ავტომობილის მართვის უფლების მინიჭებასაც ითვალისწინებდა.

ბინ სალმანი ოქტომბერში, საუდელი ჟურნალისტის, ჯამალ ხაშოგის სასტიკ მკვლელობამდე რეფორმატორად მიიჩნეოდა. ჟურნალისტი სტამბოლში, საუდის არაბეთის საკონსულოში მოკლეს. სამეფოს ხელისუფლებაში სალმანის კავშირს მკვლელობასთან კატეგორიულად გამორიცხავენ.