"ეს იყო ჩემთვის წარმოუდგენელი რამ..." - ეკა ბესელია განმარტავს, რა პროცესი გადაიდო მისი თანამდებობიდან წასვლით

საპარლამენტო უმრავლესობის წევრის, ეკა ბესელიას განცხადებით, პარლამენტის თავმჯდომარე ირაკლი კობახიძე წლის ბოლო სამუშაო დღეს იურიდიული კომიტეტის სხდომის ჩანიშვნას და მოსამართლეობის კანდიდატების სიის დაჩქარებულად განხილვას სთხოვდა.

როგორც ბესელიამ "ტვ პირველის" ეთერში განაცხადა, ის საკითხის დაჩქარებული წესით განხილვის წინააღმდეგი იყო და იურიდიული კომიტეტის თავმჯდომარეობიდან გადადგომით, ეს პროცესი გადადო.

"პარასკევს სხდომის ჩანიშვნის იდეა ირაკლი კობახიძემ მომაწოდა. პარლამენტის თავმჯდომარეს, ჩემდა სამწუხაროდ, მიაჩნდა, რომ შესაძლებელი იყო ამ სხდომის ჩატარება პარასკევსვე და ამ სხდომაზე ამ სიის მხარდაჭერა და იმავე დღეს სესიაზე ამ სიის გატანა. ეს იყო ჩემთვის წარმოუდგენელი რამ. ვიდრე შინაარსზე ვისაუბრებდი, თვითონ ფორმაც, სულ რომ იდეალური ყოფილიყო ის სია და არ ყოფილიყო მასში ისეთი გვარები, რომელიც პირდაპირ კავშირშია ძველი რეჟიმის ძალადობრივი სისტემის სასამართლოსთან, რომლის შეცვლასაც წლების განმავლობაში მე და ჩემი მეგობრები ქუჩაში, პლასტიკური ტყვიების, ხელჯოხების, გაზის გამოყენების თუ სპეცრაზმის დარბევის ქვეშ ვიცავდით და არასდროს დაგვიხევია უკან ამ ბრძოლაში... წარმოიდგინეთ მოცემულობა, რომ მე, ერთ-ერთი ის ადამიანი, ვინც პოლიტიკაში იმიტომ აღმოვჩნდი, რომ ქვეყანაში არ არსებობდა მართლმსაჯულება და იმაზე უფრო კომფორტული კაბინეტი მქონდა, ვიდრე ახლა ბატონი კობახიძეა შესული. იმაზე უფრო კომფორტულ კაბინეტზე ვთქვი უარი 2006 წელს, როდესაც ადვოკატი ვიყავი, ჩემი საკუთარი კომპანია მქონდა, კომფორტული გარემო და თავისუფლება მქონდა, მაგრამ არ მქონდა სასამართლო. როცა ქუჩაში გავედით და ძალიან ბევრნი ვიბრძოდით, მაგრამ არა ის ადამიანები, ვინც დღეს გვიპირისპირდება, მე არცერთი მათგანი ბრძოლაში არ მინახავს. 2016 წელს ძალიან ადვილია, გამარჯვებულ გუნდთან მიხვიდე", - განაცხადა ბესელიამ.

მისივე თქმით, არაერთხელ უთქვამს და კიდევ იტყვის უარს კაბინეტზე და თანამდებობებზე, როდესაც საუბარი სამართლიანობის აღდგენას ეხება.

"ვიდრე ბატონი ირაკლი კობახიძე ახლა იმ კაბინეტთან დგას და, ასე მგონია, იცავს იმ კაბინეტის თემას, მე გავაგრძელებ იმ ფასეულობებისა და ღირებულებებისთვის ბრძოლას და მის დაცვას, რისთვისაც იმ კაბინეტზეც და ბევრ უკეთეს კაბინეტზეც უარი მითქვამს და კიდევ ვიტყვი, იმიტომ, რომ არ არის არც ერთი კაბინეტი და არც ერთი თანამდებობა საპირწონე ისეთი სახელმწიფოებრივი მნიშვნელობის თემების, როგორიც არის სამართლიანობა და შენი, ჩემი და ჩვენი ქვეყნის მომავლის და ჩვენი შვილების მომავლის გარანტიების შექმნა", - განაცხადა ბესელიამ.

ეკა ბესელია იურიდიული კომიტეტის თავმჯდომარის თანამდებობიდან გასულ კვირას გადადგა.

VIDEO: "ეს იყო ჩემთვის წარმოუდგენელი რამ" - რა სთხოვა ირაკლი კობახიძემ ეკა ბესელიას