ბოლო სამ დღეში 12 000-მდე მოქალაქე აიცრა წითელას წინააღმდეგ - შეიძლება თუ არა ორსულების ვაქცინაცია

ახლა გვაქვს წითელას ფართომასშტაბიანი ეპიდაფეთქება და ფაქტობრივად ეპიდემიის ზღვარზე ვართ, - ამის შესახებ დაავადებათა კონტროლის ცენტრის სამეცნიერო დირექტორმა პაატა იმნაძემ დღეს გამართულ პრესკონფერენციაზე განაცხადა. მისი თქმით, წითელას ყველაზე მეტი შემთხვევა თბილისში, სამეგრელოში, იმერეთსა და კახეთშია.

"ჩვენი სამწუხარო პროგნოზი გამართლდა და წითელამ ისევ მკვეთრად მოიმატა. დღეისთვის 580 შემთხვევაა ქვეყანაში რეგისტრირებული. ყველაზე მეტი შემთხვევაა თბილისში, სამეგრელოში, იმერეთსა და კახეთში. დაიწყო აცრების აქტიური კამპანია და არასრული მონაცემებით ბოლო სამ დღეში 12 000-მდე მოქალაქე აიცრა წითელას საწინააღმდეგოდ. გრიპისგან განსხვავებით, წითელას ვერაფერი გაააჩერებს აცრების გარდა", - განაცხადა პაატა იმნაძემ.

მისივე განმარტებით, ორსულის აცრა გრიპზე ძალიან სასურველია, ხოლო ორსულის აცრა წითელაზე არ შეიძლება. როგორც იმნაძე ამბობს, ქვეყანაში უკვე შემოვიდა გრიპის საწინააღმდეგო აცრა ორსულებისთვის.

„გრიპის ვირუსი, საბედნიეროდ, უკან იხევს. ბოლო სამი კვირაა ქვეყანაში კლების ტენდენცია არის. ეს ჩანს ყველა მიმიმართულებით. თუმცა, გრიპი ჯერ არ გამქრალა. გრიპი იქნება გაზაფხულამდე, ვიდრე კარგად არ დათბება. აქედან გამომდინარე საჭიროა, სიფრთხილე“, - განაცხადა იმნაძემ.