ზვიად კვაჭანტირაძემ საპარლამენტო უმრავლესობა და ფრაქცია "ქართული ოცნება" დატოვა, უმრავლესობის დატოვებას არ გამორიცხავს კობა ნარჩემაშვილიც

დეპუტატმა ზვიად კვაჭანტირაძემ საპარლამენტო უმრავლესობა და ფრაქცია „ქართული ოცნება“ დატოვა.

ფრაქციის თავმჯდომარის, მამუკა მდინარაძის ინფორმაციით, მათ მიიღეს ზვიად კვაჭანტირაძის მიმართვა უმრავლესობიდან და ფრაქციიდან გასვლის თაობაზე, რაც გათვალისწინებულია და ბიუროს უახლოეს სხდომაზე ეცნობება.

მისივე თქმით, ამის თანმდევი პროცესი იქნება ზვიად კვაჭანტირაძის გადარჩევა დიასპორისა და კავკასიის საკითხთა კომიტეტის თავმჯდომარის თანამდებობიდან, რადგან ის პარლამენტმა აღნიშნულ პოსტზე უმრავლესობის წარდგენით აირჩია.

„უმრავლესობიდან და ფრაქციიდან გასვლის მიზეზებზე თავად ზვიად კვაჭანტირაძე საუბრობს. ამის მიზეზი არის ის ანტიკონსტიტუციური კანონი, რასაც „ქართული ოცნების“ უმრავლესობამ მხარი არ დაუჭირა“, - განაცხადა მამუკა მდინარაძემ.

უმრავლესობის რიგების დატოვებას არ გამორიცხავს პარლამენტში ქუთაისის მაჟორიტარი დეპუტატი კობა ნარჩემაშვილი.

როგორც ნარჩემაშვილმა ჟურნალისტებს განუცხადა, თუკი ოპონირების რეჟიმში იქნება თემები, რომლებიც აზრთა სხვადასხვაობას გამოიწვევს, უბრალოდ მორალურად იქნება მიუღებელი მისთვის იყოს უმრავლესობაში.

„მორალურად მიუღებელი იქნება თან ვიყო უმრავლესობაში და თან ვიყო წინააღმდეგი რიგი საკითხებისა. ასე რომ, ამას არ გამოვრიცხავ“, - განაცხადა კობა ნარჩემაშვილმა.

რაც შეეხება მოსამართლეების უვადო დანიშვნას, ნარჩემაშვილი ფიქრობს, რომ გარკვეული გარემოებების გამო 2024 წლამდე პროცესის გადავადება შესაძლებელი იყო სასამართლო სისტემაში უფრო ჯანსაღი შემადგენლობის მისაღებად.