მამუკა ხაზარაძემ დაასახელა მინისტრი, რომლისგანაც მუქარის წერილი მიიღო

საფინანსო-საბიუჯეტო კომიტეტის სხდომაზე "თიბისი ბანკის" სამეთვალყურეო საბჭოს ყოფილმა თავმჯდომარემ, არჩევნების პირველი ტურის შემდეგ მიღებული წერილის შესახებ ისაუბრა, რომელშიც მას პირდაპირ დაემუქრნენ:

"არჩევნების მეორე ტურის წინ მე მივიღე წერილი, ერთ-ერთი ძალიან მაღალჩინოსნისგან, სადაც პირდაპირი მუქარით გვეუბნება რომ, ისინი დაანგრევენ ჩვენს რეპუტაციას ადგილზე და საერთაშორისო ასპარეზზე. ეს წერილი მე მაქვს.

იხილეთ VIDEO

მიკვირს, რომ ეს წერილი დაწერეს და სიტყვიერად არ გვითხრეს ეს ყველაფერი. იქ იყო მოთხოვნები, რომლებიც რა თქმა უნდა ჩვენ არ შევასრულეთ" - აღნიშნა ხაზარაძემ საუბრისას.

მოგვიანებით, მან დეპუტატ ირმა ნადირაშვილის შეკითხვის პასუხად, თუ ვისგან მიიღო მუქარის წერილი, სკანდალური განცხადება გააკეთა:

"აზრი არ აქვს დაველოდო კომისიას, რადგან ალბათ მალე ცნობილი გახდება საზოგადოებისთვის. წერილი მოწერილი იყო საქართველოს შინაგან საქმეთა მინისტრისგან, გიორგი გახარიასგან. მე არ მინდა აღმოვჩნდე იმ სიტუაციაში, რომ წერილებით დავიწყო სირბილი მედიაში. ეს არის მუქარის წერილი, რაღაცის შესრულების საფასურად, რაც ჩვენ არ გავაკეთეთ და არც გავაკეთებთ" - აღნიშნა ხაზარაძემ.

აღსანიშნავია რომ, დაახლოებით ორი კვირის წინ, როცა გიორგი გახარიას ჟურნალისტებმა დაუსვეს შეკითხვა გავრცელებულ ხმებზე, ჰქონდა თუ არა მას საუბარი „თიბისი ბანკის“ საქმეზე მამუკა ხაზარაძესთან და სთხოვა თუ არა წილების დათმობა, შს მინისტრმა უპასუხა:

„არ მქონია ასეთი საუბარი. მეორე, ჩვენ ახლა ვსაუბრობთ მარეგულირებლის ფინანსური რეგულაციების ფარგლებში მიღებულ გადაწყეტილებაზე. ამ გადაწყვეტილებაზე მე კომენტარს არ და ვერ გავაკეთებ“.