სოციალური ქსელების მომხმარებლებს ახალი გატაცება აქვთ - უკვე რამდენიმე დღეა „ყველის გამოწვევა“ „ფეისბუქსა“ და „ინსტაგრამზე“ ვირუსულად ვრცელდება.
მშობლები აზიარებენ ვიდეოებს, სადაც ჩანს, რომ ისინი მცირეწლოვან შვილებს სახეში მდნარი ყველის ნაჭრებს ესვრიან, შემდეგ კი ბავშვების რეაქციას აკვირდებიან.
„გამოწვევა“ აშშ-ში დაიწყო, პირველი ვიდეო მიჩიგანელმა მამამ გააზიარა, იდეა სხვა შტატებშიც მოიწონეს და სულ მალე სოცქსელებში ასობით ვიდეო განთავსდა, სადაც ყველის ნაჭრის სროლისგან გაოგნებული ბავშვების სახეები ჩანს.
ცხადია, გამოწვევას მსოფლიოს მასშტაბით სხვადასხვაგვარი გამოხმაურება მოჰყვა. ნაწილი ვიდეოებით ერთობა და ამბობს, რომ ხუმრობა სრულიად უბოროტოა. ნაწილი კი წერს, რომ სხვა ადამიანის შეურაცხყოფა გართობად არავითარ შემთხვევაში არ შეიძლება მივიჩნიოთ.
ინტერნეტმომხმარებლების კიდევ ერთი ნაწილი კი ყველის მიმართ უდიერად მოპყრობამ გააღიზიანა, ისინი წერენ, რომ რძის პროდუქტის გაფუჭებას არანაირი გამოწვევა არ ამართლებს.