ხვალიდან საქართველოში იწვიმებს, მოსალოდნელია თოვლიც - ნახეთ 3 დღის ამინდის პროგნოზი

უახლოესი სამი დღის განმავლობაში საქართველოში არამდგრადი ამინდია მოსალოდნელი. გარემოს ეროვნული სააგენტოს ინფორმაციით, 16 მარტიდან მოსალოდნელია ნალექი, მთიან რაიონებში კი ზოგან თოვლი. 17-18 მარტსაც არამდგრადი ამინდი შენარჩუნდება.

როგორც Ambebi.ge-ს გარემოს ეროვნულ სააგენტოში განუცხადეს, 17-18 მარტს საქართველოში და მათ შორის დედაქალაქშიც, გაძლიერდება დასავლეთის მიმართულების ქარი. ამასთან, აღნიშნულ პერიოდში ტემპერატურა 11-13 გრადუსამდე შემცირდება.

უფრო კონკრეტულად, აღმოსავლეთ საქართველოში 16 მარტს 18-22 გრადუსი სითბო დაფიქსირდება, ხოლო 17 მარტს 10-15 გრადუსამდე ტემპერატურაა მოსალოდნელი. 18 მარტსაც თითქმის იგივე ტემპერატურა შენარჩუნდება.

რაც შეეხება დასავლეთ საქართველოს, გარემოს ეროვნული სააგენტოს მონაცემებით, 16 მარტს ჰაერი 15 გრადუსამდე გათბება, 17 მარტს 10-12 გრადუსია მოსალოდნელი, ხოლო 18 მარტს 11-13 გრადუსი იქნება.

აღმოსავლეთ საქართველოს მსგავსად, დასავლეთ საქართველოშიც მოსალოდნელია წვიმა, ხოლო მაღალ მთაში თოვლი.