რა ვითარებაა პარლამენტთან - სამოქალაქო აქტივისტები შენობაში შესვლას ცდილობდნენ

ანტისაოკუპაციო მოძრაობის, „ძალა ერთობაშია"-ს ლიდერი დავით ქაცარავა და სამოქალაქო აქტივისტები პარლამენტში შესვლას ცდილობდნენ, რისი საშუალებაც მათ სამართალდამცველებმა არ მისცეს.

პარლამენტთან მიმდინარე აქციის მონაწილეებმა მიიღეს ინფორმაცია, რომ რუსი დეპუტატი სერგეი გავრილოვი სასტუმრო „რედისონში“ იმყოფება. აქციის მონაწილეების ნაწილმა მიიღო გადაწყვეტილება, რომ „რედისონთან“ გადაინაცვლონ. მანამდე კი ვითარება სამართალდამცველებსა და აქციის მონაწილეებს შორის პარლამენტის შენობის საშვთა ბიუროსთან დაძაბული იყო.

პარლამენტის შენობასთან შეკრებილების თქმით, ისინი დაშლას არ აპირებენ და მოსახლეობას 19:00 საათზე ქუჩაში გამოსვლისკენ მოუწოდებენ.

არასამთავრობო ორგანიზაციების წარმომადგენლები, სამოქალაქო აქტივისტები და პოლიტიკური პარტიების წარმომადგენლები მართლმადიდებლობის საპარლამენტო ასამბლეაზე, პარლამენტის შენობაში რუსეთის დუმის დეპუტატის სერგეი გავრილოვის მიერ ასამბლეის სხდომის წაყვანის ფაქტს აპროტესტებენ.

ოპოზიციისა და სამოქალაქო აქტივისტების პროტესტის შემდეგ, გადაწყვეტილება იქნა მიღებული, რომ ასამბლეა დღეს აღარ გაგრძელდება.

LIVE: პარლამენტში ისევ ხმაური ატყდა - აქციის მონაწილეებმა შენობის შესასვლელი დაიკავეს და სავარაუდოდ, შეჭრას ცდილობენ