ავტორი:

მამუკა ბახტაძის საგანგებო განცხადება - "ძალადობას ექნება ადეკვატური პასუხი"

მამუკა ბახტაძის საგანგებო განცხადება - "ძალადობას ექნება ადეკვატური პასუხი"

საქართველოს პრემიერ-მინისტრი იზიარებს საზოგადოების პროტესტს საქართველოს პარლამენტში რუსი დეპუტატების გამოჩენასთან დაკავშირებით, თუმცა ამბობს, რომ რაც ამჟამად რუსთაველის გამზირზე ხდება, არის ძალადობა.

„ეს ყველაფერი მშვიდობიანი პროტესტის ფორმით დაიწყო და რა თქმა უნდა, საქართველოში ნებისმიერ ადამიანთა ჯგუფს აქვს უფლება, გამოხატოს პროტესტი. ეს იყო გულწრფელი და სამართლიანი პროტესტი, მაგრამ ბოლო 2 საათის განმავლობაში რასაც ვადევნებთ თვალყურს, ეს არის ძალადობა, მცდელობა, რომ აგრესიულმა ჯგუფმა „ნაციონალურმა მოძრაობამ“ საქართველო გაიყვანოს იმ სამართლებრივი ჩარჩოებიდან, რომელიც ქვეყანაში შეიქმნა და უზრუნველყოფს მის სტაბილურ განვითარებას.

მთელი 7 წლის განმავლობაში ვადევნებთ თვალყურს, რომ „ნაციონალური მოძრაობა“ ცდილობს შემოიტანოს დისონანსი, არასტაბილურობის განცდა საზოგადოებაში და მას ეს არ გამოსდიოდა. არც ახლა გამოუვა.

განსაკუთრებით მივმართავ ახალგაზრდებს, თაობას, რომლის ხელშიც არის მომავალი, რომელიც არის ყველაზე დიდი ენერგიის და სამართლიანობის მატარებელი - მე ვარ თქვენ გვერდით გულწრფელ პროტესტში, მაგრამ ამ შემთხვევაში გვაქვს საქმე ძალიან ვიწრო პოლიტიკურ ინტერესთან, პოლიტიკურ მცდელობასთან, რომელიც არ ჯდება სამართლებრივ ჩარჩოებში.

საქართველოში ძალადობა არის მიუღებელი, ჩვენ ვართ შემდგარი ქვეყანა და ძალადობას არასოდეს შევეგუებით. ძალადობას ექნება ადეკვატური პასუხი,“ - აღნიშნა ბახტაძემ.

პრემიერის თქმით, საზოგადოების მსგავსად, საქართველოს პარლამენტში რუსი დეპუტატების გამოჩენა მისთვისაც მიუღებელი იყო და მომხდარს პასუხი „აუცილებლად გაეცემა“. თუმცა ხაზს უსვამს, რომ ახლა პროვოკაციასთან გვაქვს საქმე და საზოგადოებამ პოლიტიკოსებს ამისი საშუალება არ უნდა მისცეს.

„შეგიძლიათ, ნახოთ სოციალურ ქსელებში და „ნაციონალური მოძრაობის“ მიერ მართულ მედიაში რა ინფორმაცია ვრცელდება, რომ ვიყენებთ რეზინის ტყვიებს, სხვადასხვა ტიპის გაზს. ეს "ქართული ოცნების" ხელწერა არასოდეს ყოფილა და არც არასოდეს იქნება. ეს იყო სააკაშვილის ხელწერა,“ - განაცხადა ბახტაძემ.

LIVE: ალეკო ელისაშვილი და გიორგი ვაშაძე "ნიუსრუმში"

ანტიკვარული ჭაღები, ხალიჩები და საათები - რამდენი დახარჯა სალომე ზურაბიშვილმა რეზიდენციის მოსაწყობად

"პიკეტირება გაგრძელდება" - რას გეგმავენ "სირცხვილიას" ორგანიზატორები და როგორ არიან  აქციის დაშლის შედეგად დაშავებულები