ზაქარია ქუცნაშვილი პარლამენტს ტოვებს

„ქართული ოცნების“ დეპუტატმა ზაქარია ქუცნაშვილმა სადეპუტატო მანდატის შეწყვეტის გადაწყვეტილება მიიღო.

როგორც მან „ინტერპრესნიუსს“ განუცხადა, ის პარლამენტს ტოვებს და შესაბამისი გადაწყვეტლებით, საკანონმდებლო ორგანოს მიმართავს.

„სამოქალაქო მშვიდობა და თანხმობა გაცილებით უფრო ღირებულია, ვიდრე პარლამენტის წევრის მანდატი“, - განუცხადა „ინტერპრესნიუსს“ ზაქარია ქუცნაშვილმა.

მისივე თქმით, გუშინ საქართველომ მთელს მსოფლიოს დაანახა, რომ ოკუპაციას არ შეეგუება:

“ეს იყო ჩემი მიზანი და ამიტომაც მეგონა, რომ ოპოზიცია და პოზიცია ამას ყველა ერთად ვიზეიმებდით, ნაცვლად იმისა, რომ საზოგადოების სამართლიანი პროტესტი მერკანტილურ ინტერესებში გადაეზარდათ და ძალადობრივი აქციისაკენ მოეწოდებინათ“ - განაცხადა ქუცნაშვილმა.

ცნობისთვის, ქუცნაშვილი მართლმადიდებლობის საპარლამენტთაშორისო ასამბლეაში ქართულ დელეგაციას ხელმძღვანელობდა. შესაბამისად, ის ერთ-ერთი ორგანიზატორი იყო თბილისში გამართული სესიისა, რომელიც საპროტესტო აქციების მიზეზი გახდა.

შეგახსენებთ, რომ რუსთაველის გამზირზე, მოქალაქეები რუსი დეპუტატის საქართველოში ჩამოსვლას და სერგეი გავრილოვის მიერ, პარლამენტის თავმჯდომარის სავარძლის დაკავებას აპროტესტებდნენ. პარლამენტის წინ სიტუაცია 20 ივნისს, დაახლოებით 22:00 საათზე დაიძაბა, მას შემდეგ, რაც დემონსტრანტები პარლამენტის შენობის შესასვლელისკენ დაიძრნენ. მათ აქციის მონაწილეების მისამართით ცრემლსადენი გაზი, რეზინის ტყვიები და წყლის ჭავლი გამოიყენეს.