"შენთან ერთად მეც ვასრულებ "აქტიურ სპორტულ კარიერას"... - რას წერს ზაზა ფაჩულიას მეუღლე

საქართველოს ნაკრების ყოფილმა კაპიტანმა ზაზა ფაჩულიამ კალათბურთელის კარიერა დაასრულა. იგი "გოლდენ სტეიტში" კონსულტანტის თანამდებობაზე იმუშავებს.

კალათბურთელის მეუღლე, თიკა ალავიძე-ფაჩულია ყოველთვის, ყველა წამოწყებაში მხარში უდგას ქმარს და სოციალური ქსელითაც ხშირად ამხნევებს მას. ამჯერად, ის წყვილის ცხოვრებაში ახალი ეტაპის დაწყებას უსვამს ხაზს, რაშიც ფაჩულიას აქტიური სპორტული კარიერის დასრულებას და ახალ გამოწვევებთან შეჭიდებას გულისხმობს:

"ყველაფერს აქვს თავის დასაწყისი და დასასრული... შენთან ერთად მეც ვასრულებ "აქტიურ სპორტულ კარიერას", კითხვა მიჩნდება ჩემ თავთან: რას ვაკეთებთ ხვალიდან?! ვაკეთებთ იმას, რაც ყველაზე კარგად გამოგვდის, ვიღებთ ახალ გამოწვევებს და ვიბრძვით ახალი სიმაღლეების დასაპყრობად, შენ და “ჩვენ” ყველანი ერთად, სხვანაირად არ წარმომიდგენია" - წერს თიკა ალავიძე-ფაჩულია.

ფაჩულია და ალავიძე 10 წელი დაქორწინებული არიან. წყვილს 4 შვილი ჰყავს.

შეგახსენებთ, ზაზა "გოლდენ სტეიტში" 2016-17 და 2017-18 წლების სეზონში თამაშობდა. ორივეჯერ NBA-ს ჩემპიონის ტიტული მოიგო. გასულ სეზონში კი "დეტროიტის" ღირსებას იცავდა. რაც შეეხება საქართველოს ნაკრებს, ზაზა 2000 წლიდან 2017-მდე თამაშობდა და ეროვნულ გუნდთან ერთად სამ ევრობასკეტზე იასპარეზა.

ამასთან, ცოტა ხნის წინ ზაზა ფაჩულია სწავლას დაუბრუნდა და ჰარვარდის უნივერსიტეტის ბიზნესის სკოლის სტუდენტი გახდა.