მიხეილ სააკაშვილმა ოდესაში, მარკეტოლოგებთან ლექციაზე საქართველოში ტურიზმის განვითარებაზე ისაუბრა. ყოფილმა პრეზიდენტმა გაიხსენა დონალდ ტრამპის ნათქვამი, რომ „ხუთი წლის შემდეგ ბათუმი მსოფლიოში ყველაზე მაგარი ქალაქი უნდა ყოფილიყო“.
„რატომ ჩამოვიდა ტრამპი საქართველოში? რატომ გვაქებდა? მეპატიჟებოდა თავის სახლში, ნიუ-იორკში ჩემთან ერთად დადიოდა ქუჩებში, თეატრებსა და რესტორნებში. რატომ? იმიტომ, რომ ყველას მოსწონს, წარმატებასთან იყოს ასოცირებული.
მაშინ ის აშშ-ს პრეზიდენტობის კანდიდატი იყო და სურდა, წარმატებასთან ყოფილიყო ასოცირებული. ის ყველგან ამბობდა - „მე ვიცნობ სააკაშვილს, ის ისეთი მაგარია! ბათუმიდან ჩამოვედი, მსოფლიოში საუკეთესო ქალაქია! მათ განათლებისა და გადასახადების საუკეთესო სისტემები აქვთ და ა.შ.“ - აღნიშნა სააკაშვილმა.