ხაშურში მამაკაცმა ყოფილი ცოლი დაჭრა - ქალი საავადმყოფოში გარდაიცვალა

ხაშურში ახალგაზრდა მამაკაცმა ყოფილი მეუღლე დაჭრა. დაჭრილი ქალი ხაშურის საავადმყოფოში გადაიყვანეს, თუმცა მისი გადარჩენა ვერ მოხერხდა. კლინიკაში აცხადებენ, რომ საავადმყოფოში შეყვანისას პაციენტს სიცოცხლისთვის შეუთავსებელი დაზიანებები აღენიშნებოდა.

ბრალდებული 30 წლამდე მამაკაცი ირაკლი დეკანოიძეა, გარდაცვლილი ქალი, კი ნათია გოგალაძე, ასევე 30 წლამდე ასაკისაა.

ყოფილ ცოლ-ქმარს ორი შვილი ჰყავთ. არსებული ინფორმაციით, მათ შორის კონფლიქტი შვილების გამო მოხდა.

"მთავარი არხის" ინფორმაციით, მამაკაცმა თავდაპირველად ყოფილი ცოლის სამუშაო ადგილას ხელყუმბარა შეაგდო, რის გამოც მიმდებარე ტერიტორიიდან ხალხის ევაკუაცია განხორციელდა. შემდეგ კი ტერიტორიაზე შეიჭრა და დაზიანებები მიაყენა, სავარაუდოდ, ბლაგვი საგნით.

ტელეკომპანიის ინფორმაციით, დღეს სასამართლოში წყვილის განქორწინებასთან დაკავშირებით პროცესი უნდა გამართულიყო და სავარაუდოდ, სწორედ ამის გამო მიიჭრა ყოფილ მეუღლესთან მისი მოკვლის მიზნით ირაკლი დეკანოიძე.

მომხდარზე სისხლის სამართლის საქმე 108-ე მუხლით არის აღძრული, რაც განზრახ მკვლელობას გულისხმობს. ბრალის დამტკიცების შემთხვევაში, მამაკაცს 7-დან-15 წლამდე თავისუფლების აღკვეთა ემუქრება.