"როდესაც მანქანაში ჩავხტით, ცეცხლი უკვე ჩვენს სახლთან იყო მოსული" - კალიფორნიაში ძლიერი ხანძარი მძვინვარებს

კალიფორნიაში, ტყეში გაჩენილი ხანძრის გამო 2 ათასამდე ადამიანი ევაკუირებულია, ინფორმაციას „ბიბისი“ ავრცელებს. სონომას ოლქში გაჩენილი ცეცხლი 40 ათას კვადრატულ მეტრზეა გავრცელებული. სტიქიის გაძლიერებას ქარიც უწყობს ხელს.

Associated Press-ის ინფორმაციით, ქარი დღეს ჩადგება, თუმცა უახლოეს დღეებში კვლავ გაძლიერდება.

მოსახლეობა ამბობს, რომ ევაკუაციისას დრო არ აქვთ, ნივთები შეაგროვონ. 68 წლის დუაიტ მონსონი ჰყვება, რომ იმ დროს, როდესაც ოჯახის წევრები მანქანებში ჩახტნენ და ქვემოთ, ხეობისკენ წავიდნენ, ცეცხლის ალი უკვე მათ სახლთან იყო მოსული.

180 ათასამდე ოჯახს ხანძრის შემთხვევების რისკის შესამცირებლად ელექტროენერგიის მიწოდება შეუწყვიტეს. სტიქიას 500 მეხანძრე საჰაერო წყლის ტანკერებისა და ვერტმფრენების საშუალებით ებრძვის.

შეგახსენებთ, კალიფორნიაში ხანძარს შარშან 100 ადამიანის სიცოცხლე შეეწირა.