ქალი, რომლის გადასარჩენად შვილები ტაქსაობდნენ, გარდაიცვალა - "მადლობა, რომ დედამ იმედით იცოცხლა ეს პერიოდი..."

ქალი, რომლის გადასარჩენადაც შვილები - ნიკა და რატი ქართველიშვილები თბილისში ტაქსაობდნენ, გარდაიცვალა. ამის შესახებ „ფეისბუქზე“ ნიკა ქართველიშვილი წერს.

54 წლის მაია ქართველიშვილს მწვავე ლეიკემია ივნისში დაუდგინდა. სამკურნალოდ ის თურქეთში გადაიყვანეს. მკურნალობის საწყისი ეტაპისთვის ოჯახს 150 000 დოლარი სჭირდებოდა.

დედის დასახმარებლად ბიჭებმა ტაქსაობა გადაწყვიტეს, მანქანაზე წარწერით „#მაიასთვის დავამარცხოთ ლეიკემია“. ოჯახს უამრავი გულშემატკივარი გამოუჩნდა, შეიქმნა „ფეისბუქის“ გვერდი „მაიასთვის“, სადაც სიმსივნით დაავადებულ ქალს და მის ოჯახს მორალურად ამხნევებდნენ, მათ საბანკო ანგარიშზე კი მსურველები თანხასაც რიცხავდნენ.

ერთ-ერთმა მოქალაქემ კი ძმებს საკუთარი მანქანაც ათხოვა.

ოჯახისა და ექიმების მცდელობის მიუხედავად, ქალის გადარჩენა ვერ მოხერხდა.

„მეგობრებო, დედა გარდაიცვალა. ძალიან დიდი მადლობა ყველას თანადგომისთვის, გამხნევებისთვის, იმისთვის რომ დედამ იმედით იცოცხლა ეს პერიოდი.მადლობა ყველას, ყველანი გვიყვარხართ,“ - დაწერა დღეს „ფეისბუქზე“ ნიკა ქართველიშვილმა.