უბედური შემთხვევა საქალაქო სასამართლოში - ადვოკატი პროცესის დროს გარდაიცვალა

თბილისის საქალაქო სასამართლოში ცოტა ხნის წინ უბედური შემთხვევა მოხდა - ადვოკატი ნოდარ ილურიძე სასამართლო პროცესზე, სავარაუდოდ, გულის შეტევით გარდაიცვალა.

ტრაგედია საქალაქო სასამართლოში დაახლოებით 12:00 საათისთვის მოხდა. ადვოკატი სასამართლო პროცესზე, მოულოდნელად გახდა შეუძლოდ, რის გამოც სასწრაფო დახმარების ბრიგადა გამოიძახეს, თუმცა ადგილზე მისულ ექიმებს ადვოკატი უკვე გარდაცვლილი დახვდათ.

ადვოკატი მარიამ კუბლაშვილი შემთხვევის დროს საქალაქო სასამართლოში იმყოფებოდა. მან AMBEBI.GE-ს უბედური შემთხვევის დეტალები უამბო:

"საშინელი ტრაგედია მოხდა. მე ვიყავი იმ დროს საქალაქო სასამართლო ეზოში, როდესაც ჩოჩქოლი ატყდა და გავიგე, რომ ჩემი კოლეგა გარდაიცვალა პროცესის დროს.

ნოდარ ილურიძე 60 წლამდე ასაკის იყო. მას ჰყავს ოჯახი. როგორც ამბობენ, ჯანმრთელობის რაიმე სერიოზული პრობლემა არ ჰქონია... სავარაუდოდ, გულის შეტევით გარდაიცვალა. მთელი დღე სხვაზე ვერაფერზე ვფიქრობ, საშინელი ტრაგედიაა..." - განუცხადა AMBEBI.GE-ს კუბლაშვილმა.

ადვოკატის გარდაცვალებაზე მწუხარებას გამოთქვამს საქართველოს ადვოკატთა ასოციაციის თავმჯდომარე დავით ასათიანი:

"მაცნობეს სამწუხარო ამბავი - პროფესიული მოვალეობის შესრულებისას, ჩვენი კოლეგა ნოდარ ილურიძე გარდაიცვალა სასამართლო სხდომის დარბაზში. ადვოკატთა ასოციაციის სახელით, ვუთანაგრძნობ ოჯახს და მეგობრებს" - წერს ასათიანი სოციალურ ქსელში.