ავტორი:

რა გახდა  განათლების მინისტრის  გადადგომის მიზეზი - მიხეილ ბატიაშვილის პირველი კომენტარი

რა გახდა  განათლების მინისტრის  გადადგომის მიზეზი - მიხეილ ბატიაშვილის პირველი კომენტარი

ჩემი გადაწყვეტილების მიზეზი არის პირადი და დიდ იმედს გამოვთქვამ, ამას არ მოყვება დამატებითი პოლიტიკური სპეკულაციები, - ამის შესახებ განათლების, მეცნიერების, კულტურისა და სპორტის მინისტრის პოსტიდან გადამდგარმა მიხილ ბატიაშვილმა მთავრობის სხდომის დასრულების შემდეგ ჟურნალისტებს განუცხადა.

როგორც ბატიაშვილმა აღნიშნა, ის აფასებს პრემიერ-მინისტრის მხარდაჭერას როგორც განათლების სისტემის მიმართ, ასევე, მის გადაწყვეტილებასთან დაკავშირებით.

„მინდა გითხრათ, რომ მივიღე გადაწყვეტილება, დავტოვო მინისტრის თანამდებობა. ჩემი გადაწყვეტილების მიზეზი არის პირადი და დიდ იმედს გამოვთქვამ, ამას არ მოყვება დამატებითი პოლიტიკური სპეკულაციები.

ამასთან დაკავშირებით აქტიური კონსულტაციები მქონდა პრემიერ-მინისტრთან.

მინდა დიდი მადლობა ვუთხრა მას იმისათვის, რომ პირადად აქტიურად არის ჩართული რეფორმის ფარგლებში მიმდინარე პროცესებში“, - განაცხადა მიხეილ ბატიაშვილმა.

მიხეილ ბატიაშვილმა მისი მინისტრობის პერიოდის მიღწევებზე ისაუბრა და აღნიშნა, რომ განათლების სისტემაში მოხდა ძირეული გარდატეხა.

„ამ პერიოდის განმავლობაში გვქონდა მრავალი უპრეცედენტო მიღწევა სპორტის მიმართულებით, დავიწყეთ ცვლილებები კულტურის სფეროში, რაც აუცილებლად საჭიროებს გაძლიერებას, ხოლო განათლების სისტემაში მოხდა ძირეული გარდატეხა. ეს არის „ქართული ოცნების“ უდიდესი მიღწევა.

პირველად, სწორედ ამ ხელისუფლების დროს გახდა განათლება ერთ-ერთი მთავარი პრიორიტეტი, როგორც მნიშვნელოვანი ფაქტორი ქვეყნის განვითარებისთვის. ეს უკვე დადასტურდა საქმით!“ - განაცხადა მიხეილ ბატიაშვილმა.

ყოფილი მინისტრის თქმით, ის დარწმუნებულია, რომ მისი წასვლა არ შეაფერხებს იმ განვითარებას, რომელიც შეუქცევადი პროცესია.

„ამ ეტაპზე, როდესაც განათლების რეფორმა სისტემურად მიმდინარეობს, იმ ფონზე, როდესაც სისტემა სწორ გზაზე დგას, დარწმუნებული ვარ, პირადად ჩემი წასვლა არ შეაფერხებს იმ განვითარებას, რომელიც არის შეუქცევადი პროცესი. სხვა შემთხვევაში, ამ გადაწყვეტილებას არ მივიღებდი“, - აღნიშნა ბატიაშვილმა.

თანამდებობის დატოვების შემდეგ, მიხეილ ბატიაშვილმა იმ კომპლექსურ ცვლილებებზე ისაუბრა, რომელიც განათლების ყველა მიმართულებით განხორციელდა.

„ჩვენ დავიწყეთ ცვლილებები მთელი სისტემის, განათლების ყველა მიმართულებით და ეს პროცესი, რა თქმა უნდა, გაგრძელდება პროფესიონალების იმ გუნდთან ერთად, რომელიც სამინისტროში მუშაობს, იმ სტრატეგიისა და გეგმის საფუძველზე, რომელიც ამ პერიოდში ჩამოყალიბდა და რეფორმის ფარგლებში განათლების ყველა საფეხურზე ხორციელდება”, - განაცხადა ბატიაშვილმა.

რა მდგომარეობაშია ილია ჯიშკარიანი, რომელმაც ინფარქტი მიიღო

ბიზნესომბუდსმენი  და მისი მოადგილე  თანამდებობებს ტოვებენ

"რაღაც საშიში არეულობა გვიახლოვდება" - ლევან ვასაძე პოლიტიკაში მოსვლას არ გამორიცხავს