"ტერაბანკის" მარკეტინგის მენეჯერი პრე­მია "იკას" შესახებ - "ეს წამოწყება კარგად მიესადაგება ჩვენს სოციალურ პასუხისმგებლობას"

პრემია "იკა" ახალგაზრდა არტისტების, ხელოვანი ადამიანების და მათი შემოქმედების აღიარებისთვის 2018 წელს შეიქმნა. როგორც მისი დამფუძნებლები ამბობენ, IKA AWARD - ახალი აღმოჩენებისა და მათთვის მადლობის გამოხატვის საშუალებაა. პრემიის სლოგანია - შენი შემოქმედება მნიშვნელოვანია / YOUR ART MATTERS. IKA AWARD -ის შესახებ პრემია "იკას" ოფიციალური წარმდგენის - "ტერაბანკის" მარკეტინგის მენეჯერის ანა მარგიანი საუბრობს:

- გვიამბეთ ტერაბანკის კულტურული პლატფორმისა და თქვენი საქმიანობის შესახებ

- ტერაბანკისთვის მცირე და საშუალო ბიზნესი სტრატეგიული სეგმენტია, ამიტომ ჩვენი საქმიანობით მუდმივად ვცდილობთ მათ განსაკუთრებულ მხარდაჭერას. თუმცა, გასულ წელს ეს მხარდაჭერა უკვე ჩვენს კორპორაციულ სოციალურ პასუხისმგებლობაშიც ინტეგრირდა.

ჩვენ ირგვლივ ცხოვრობენ ადამიანები, რომლებსაც ძალიან საინტერესო და გამორჩეული შემოქმედებითი ხელობა აქვთ, თუმცა მათ შესახებ ბევრმა არაფერი იცის. ვიფიქრეთ, რომ კარგი იქნებოდა, მოგვეძებნა ისინი და მერე საზოგადოებისთვისაც გაგვეცნო. მოგვეყოლა, როგორი შემოქმედება აქვთ, რას გრძნობენ, განიცდიან და გამოხატავენ საკუთარი ქმნილებებით.

როცა მოძიება დავიწყეთ, მართლაც, არაჩვეულებრივი პერსონაჟები აღმოვაჩინეთ: განსხვავებული ჰობითა და ხელობით, რომლებიც ახალსა და უჩვეულოს ქმნიან. პროექტსაც „საინტერესო ადამიანები“ დავარქვით და მის ფარგლებში საზოგადოებას სხვადასხვა შემოქმედების ადამიანებს სისტემატურად ვაცნობთ.

- ორი წლის წინ ქართულ შემოქმედებით ინდუსტრიაში გაჩნდა ახალი თანამედროვე კულტურული პლატფორმა პრემია იკა, რომელიც სხვა არსებული პრემიებისგან სრულიად განსხვავებულია. რატომ მიიპყროპრემია იკამ თქვენი ყურადღება?

- კულტურული პრემია „იკა“ შემოქმედებითი ინდუსტრიის განსხვავებულ სფეროებში მოღვაწე არტისტებს გადაეცემათ და მიზნად ნიჭიერი ადამიანებისა და მათი შემოქმედების აღიარებას, უცნობი ავტორების აღმოჩენას, პოპულარიზაციას, წახალისებასა თუ მათთვის შემდგომ საქმიანობაში ხელშეწყობას ისახავს. რადგან ნიჭიერი ადამიანების მხარდაჭერას ტერაბანკის მხრიდან განსაკუთრებული ყურადღება ეთმობა, ეს წამოწყება ძალიან კარგად მიესადაგება ჩვენს სოციალურ პასუხისმგებლობას და მის ფარგლებში განხორციელებულ ინიციატივებს, ამიტომ მის მხარდაჭერაში დიდი ენთუზიაზმით ჩავერთეთ.

- როგორ ფიქრობთ, რამდენად მნიშვნელოვანია თანამედროვე კულტურული პრემიის არსებობა დღევანდელ რეალობაში?

- პრემია „იკას“ მსგავსი ინიციატივები მნიშვნელოვანია მთლიანად შემოქმედებითი ინდუსტრიის განვითარებისთვისა და ახალი სახეების აღმოჩენისთვის. ასეთი აქტივობები ზოგადად ძალიან კარგი სტიმულია ახალგაზრდა არტისტებისთვის, რომლებსაც სწორედ საწყის ეტაპზე სჭირდებათ მხარდაჭერის დემონსტრირება.

- წელს პრემია იკა ახალი ნომინაციებით დაბრუნდა, ერთ-ერთი მათგანია, კედლის მხატვრობა, რომელიც არც თუ ისე განვითარებული მიმართულება იყო ჯერ კიდევ რამდენიმე წლის წინ, როგორ ფიქრობთ, შესაძლებელია, რომ ასეთი ნომინაციების დამატებამ, კონკრეტულად ამ მიმართულებებში მოღვაწე ახალგაზრდების რაოდენობის ზრდა გამოიწვიოს?

- მიმართულებების გამრავალფეროვნება და ყველა ახალი ნომინაცია ახალგაზრდების მოტივაციის ამაღლებას, კონკრეტულ სფეროებში ახალი სახეების გამოჩენას გამოიწვევს, ამიტომ პრემია „იკას“ ამ თვალსაზრისით მნიშვნელოვანი როლის შესრულება შეუძლია.

- როგორ ხედავთ პრემია იკას მომავალს და თქვენს როგორც წარმდგენის თანამონაწილეობას ამ პრემისს მომავალში?

- იმედი გვაქვს, რომ პრემია „იკას“ მასშტაბები და მნიშვნელობა სამომავლოდ კიდევ უფრო გაიზრდება. მოხარულები ვიქნებით, თუ ამაში ჩვენი წვლილიც იქნება.