ავარიაში გარდაცვლილი მოზარდების მერხები ჩაქვის სკოლის ეზოში დაალაგეს
"ჩაქვი გლოვობს, უფალმა დაგიმკვიდროთ ცათა სასუფეველი სიცოცხლით სავსე ვაჟკაცებო! გამძლეობა თქვენს ოჯახებს" - ასე ეხმაურებიან ავტოსაგზაო შემთხვევის შედეგად ხუთი მოზარდის გარდაცვალებას ჩაქვის N1 საჯარო სკოლაში.
მტირალას პარკთან მომხდარი ავტოსაგზაო შემთხვევის დროს დაღუპული 5 არასრულწლოვანიდან ოთხი - ჩაქვის N1 საჯარო სკოლის მეთერთმეტე კლასის მოსწავლეები: საბა დიასამიძე, ნიკა ბეჟანიძე და გიგა ფალავანდიშვილი, ასევე ამავე სკოლის ყოფილი მოსწავლე ლუკა ზაქარაძე იყვნენ, კიდევ ერთი დაღუპული კი, მათი თანატოლი და მეგობარი გიორგი არძენაძე, ჩაქვის სასულიერო გიმნაზიის მოსწავლე იყო.
დღეს ჩაქვის პირველი საჯარო სკოლის ეზოში, მთავარ შესასვლელთან, გარდაცვლილი მოზარდების მეგობრებმა და მასწავლებლებმა გლოვის ნიშნად დაალაგეს დაღუპულების სასკოლო მერხები.
17 წლის ბიჭები გუშინ მტირალას პარკში ავტოსაგზაო შემთხვევის შედეგად დაიღუპნენ. მსუბუქი ავტომობილი სიმაღლიდან ხევში გადავარდა. დაღუპულებს ექსპერტიზა უკვე ჩაუტარდა და მათი იდენტიფიცირება მოხდა. ცხედრები ოჯახის წევრებმა სახლებში გადაასვენეს.
ავარიის მიზეზი ამ დრომდე უცნობია, მომხდართან დაკავშირებით საქართველოს შინაგან საქმეთა სამინისტრომ გამოძიება სისხლის სამართლის კოდექსის 276-ე მუხლით დაიწყო, რაც სატრანსპორტო მოძრაობისას წესების დარღვევას გულისხმობს, რამაც ადამიანის სიცოცხლის მოსპობა გამოიწვია.
თბილისის ზღვაზე ერთმანეთს სამი ავტომანქანა შეეჯახა - გარდაცვლილია ერთი ადამიანი
მეტრო "სადგურის მოედანზე" მგზავრი ლიანდაგებში ჩავარდა
