ავტორი:

ენდე მკითხველს - "ბიბლუსის" 10 ყველაზე გაყიდვადი წიგნი, რომელთა გარეშე 2019 წელი არც შენ არ უნდა დაასრულო

ენდე მკითხველს - "ბიბლუსის" 10 ყველაზე გაყიდვადი წიგნი, რომელთა გარეშე 2019 წელი არც შენ არ უნდა დაასრულო

ყველაზე სანდო მრჩეველი წიგნის არჩევისას, კარგი მკითხველია, რომელიც ნებისმიერ შემხვედრ წიგნს არ ყიდულობს. ის დაკვირვებით არჩევს, ადარებს და აფასებს ლიტერატურას. გაიხსენეთ, თავადაც რამდენი დრო დაგიხარჯავთ წიგნის არჩევაში, რამდენი მაღაზია შემოგივლიათ სასურველის პოვნაში და რამდენჯერ შეგიცვლიათ გადაწყვეტილება.

ამიტომაც, დამერწმუნეთ, მკითხველის რჩეული წიგნები გაცილებით ფასეულია, ვიდრე მაცდური შემოთავაზებები. ამ ბლოგში სწორედ ამ წიგნებზე უნდა გესაუბროთ. 2019 წლის ყველაზე გაყიდვად წიგნებზე, რომლებსაც უემოციოდ, ალბათ, არც თქვენ დაუტოვებიხართ. და თუ ჯერ კიდევ არ გქონიათ მათი წაკითხვის სიამოვნება, ახალ წლამდე დრო ჯერ კიდევ გაქვთ.

ნიკოლოზ ტოტოღაშვილი -" შვიდი მომაკვდინებელი გრძნობა"

ამბავი იან კლაინზეა, უცნაურ მხატვარზე, რომლისთვისაც ყოველი დღე ერთნაირად უიმედოა; ფილოსოფიაც თავისებური აქვს _ ფერების ფილოსოფია; მეგობრებიც ჰყავს, თუმცა მაინც მარტოსულია... და მაინც, ვინ არის ის? ქალაქში მკვლელობების სერია იწყება და დეტექტივები მორგანი და ფორდი ამ საქმეებს იძიებენ. იანი კი პოლიციის განყოფილების მხატვარი გახდება და დახატავს ბოროტმოქმედთა ფოტორობოტებს; თუმცა, რატომღაც, დამნაშავის კვალი ყოველთვის იან კლაინთან მიდის. საინტერესოა, ვინ არის რეალური დამნაშავე _ თავად იანი, სანისადმი მისი სიყვარული თუ შვიდი მომაკვდინებელი გრძნობიდან ერთ-ერთი?

ია კარგარეთელი - "სხვა უდაბნოს საიდუმლო"

ახალგაზრდა, მომხიბვლელი ქართველი მწერალი ქალი ეგვიპტეში მიემგზავრება. უცხო, უჩვეულო და ანდამატივით მიმზიდველი სამყარო მას მოულოდნელობებით ხვდება. მთავარი მოულოდნელობა კი ახოვანი, ვერცხლისფერთვალებიანი ბედუინია, რომელიც ტელეეკრანიდან გადმოსულ აღმოსავლელ გმირს ჰგავს. თამთას მოგზაურობა იქცევა თავბრუდამსხმელი, წარმოუდგენელი მოვლენების დინებად, რომელიც ძირფესვიანად ცვლის მის ცხოვრებას. იდუმალი, ამოუცნობი სილამაზითა და ხიფათით სავსე სამყარო _ უკიდეგანო საჰარა, არაბ ბედუინთა სამფლობელო, სადაც უძველესი კულტურების გზები გადაიკვეთა; ტანჯვა, ცრემლი და ტკივილი; მოულოდნელად, უდაბნოს ქარიშხალივით მომსკდარი გრძნობა და დიდი ბედნიერება _ ამ ყველაფერს ავტორის უშრეტი ფანტაზიის წყალობით ვეზიარებით.

ელიფ შაფაქი - "სიყვარულის 40 წესი"

თანამედროვე ამერიკელი ქალის ერთფეროვან ცხოვრებაში ქარიშხალივით შემოიჭრება ორი საოცარი და საოცნებო სამყარო: სიყვარული და ... აღმოსავლეთი!

"ისინი ერთ ქალაქში არ ცხოვრობდნენ. თქვენ წარმოიდგინეთ, არც ერთ კონტინენტზე. მათ მხოლოდ მანძილი როდი აშორებდათ ... მაგრამ ეს მაინც მოხდა... ელამ გონს მოსვლაც ვერ მოასწრო, რათა ამ ყველაფერს წინ აღსდგომოდა, თუკი... შესაძლებელია, სიყვარულს წინ აღუდგე".

დიახ, სიყვარულის წინაშე ადამიანი უძლურია, ამიტომ შეუძლებელია, მკითხველი არ ააღელვოს ელა რუბინშტეინისა და მწერალ აზიზ ზაჰარას უცნაურმა და რომანტიკულმა ურთიერთობამ.

ყური მიუგდეთ აღმოსავლეთის შექსპირის – ჯალალ-ედ-დინ რუმისა და მისი მზის – შამს თებრიზის მსჯელობას ღმერთზე, სიყვარულზე, სიცოცხლეზე, სიკვდილსა და უკვდავებაზე...

ჯერომ სელინჯერი - "თამაში ჭვავის ყანაში"

ამერიკელი მწერლის, ჯერომ სელინჯერის „თამაში ჭვავის ყანაში“ მსოფლიო კლასი კაა, რომელიც არაერთ ენაზე ითარგმნა და მილიონობით ეგზემპლარი გაიყიდა.

ჰოლდენი თვლის, რომ ის უკვე გადაიჩეხა იმ უფსკრულიდან, რომელიც ჭვავის ყანაში იყო ჩამალული. მაგრამ მას სურს, რომ სხვები მაინც გადაარჩინოს. იდგეს უფსკრულის პირას და უყუროს ბავშვებს, რომლებიც თავისთვის თამაშობენ, ხოლო როცა მათ გადავარდნის საფრთხე დაემუქრებათ, გადაარჩინოს ისინი. სწორედ ჰოლდენის ამ მონოლოგიდან წარმოსდგება ნაწარმოების სათაურიც.

თათული ღვინიანიძე - "აღიარება ხელისგულზე"

რადა მოდებაძეს, ჟურნალისტიკის ფაკულტეტის სტუდენტს, ბევრი თანატოლის მსგავსად, კომპლექსები და შიშები არ ასვენებს. ის გამუდმებით იბრძვის საკუთარ თავთან და გარესამყაროსთან. მოდებაძეს ვერ ამჩნევენ ან დასცინიან, ამიტომ ბოროტდება და ყურადღებას „ბინძური გზებით“ იქცევს. მთავარ პერსონაჟს გამუდმებით ამცირებს ანდრია მახარაძე, უნივერსიტეტში ყველაზე პოპულარული ბიჭი. რადას ეზიზღება კურსელი და გადაწყვეტს, ჭკუა ასწავლოს. ანდროს საიდუმლოებების გამოსააშკარავებლად, გოგონა კურსელის წარსულში იწყებს ქექვას. სულ მალე ჩვეულებრივი Hate Story ნამდვილ ომში გადაიზრდება... ომში, რომელიც ბრაზით, სიძულვილით, სიყვარულით, ვნებით, ტყუილით, მონატრებით, გაუგებრობებით, ღალატითა და ინტრიგითაა სავსე.

ერიხ მარია რემარკი - "აჩრდილები სამოთხეში"

ჟურნალისტი და მწერალი, მშვენიერი მსახიობი, გენიალური ქირურგი, წარმატებული ბიზნესმენი, წინააღმდეგობის მოძრაობის მონაწილე გმირი და ლეგენდა – ყველანი „ამერიკულ სამოთხეში“ მოხვდნენ, გამოქცეულნი ევროპიდან, სადაც მეორე მსოფლიო ომი მძვინვარებს. ამ, ერთი შეხედვით, კეთილდღეობაში ვერ პოულობენ სულიერ სიმშვიდეს. მათ აერთიანებთ მძიმე ტვირთი: თითოეულმა დაკარგა ოჯახი, მეგობრები, საყვარელი საქმე, დაკარგა სამშობლო... და, მიუხედავად წარმატებისა სიყვარულსა თუ პროფესიაში, აჩრდილებივით არსებობენ ემიგრანტები ახალ სამყაროში, ერთი იმედით – ოდესმე შინ დაბრუნდებიან.

რომანი „აჩრდილები სამოთხეში“ პირველად ითარგმნა ქართულ ენაზე.

ელიფ შაფაქი - "ევას სამი ქალიშვილი"

პერი, შირინი და მონა ერთმანეთისგან სრულიად განსხვავებული სამი მეგობარია, სამი მუსლიმი – აღმოსავლეთის შვილი. ოქსფორდის უნივერსიტეტში სწავლობენ, ევროპის ცენტრში. უყვართ, სძულთ, ერთგულებენ, განიცდიან, ბრაზობენ, ღალატობენ – ისეთი ვნებით, როგორიც 19-20 წლის ახალგაზრდებს სჩვევიათ... და ამ ვნებებში ბოლომდე იხარჯებიან, როგორც ნებისმიერი მათ ასაკში. ამ ასაკმა, მათმა გულწრფელობამ და უმანკოებამ თითქოს ყველა შეცდომა უნდა გააქარწყლოს, მაგრამ...

პერი, შირინი და მონა – პირველმშობელი ევას სამი ქალიშვილი, კაცობრიობის მამოძრავებელი სამი ენერგია – ელიფ შაფაქის სულ ახალ რომანში მკითხველს დაუმტკიცებენ, რომ სამყარო ისევ ეჭვზე, ცოდვასა და ღვთისმოსაობაზე დგას, როგორც ევას დროს.

კაზუო იშიგურო - "როცა ობლები ვიყავით"

მეოცე საუკუნის გარიჟრაჟზე შანხაიში დაბადებული ინგლისელი ბიჭუნა, ქრისტოფერ ბენქსი, ცხრა წლის ასაკში ობლდება. მისი მშობლები საეჭვო ვითარებაში უჩინარდებიან. ბიჭს საცხოვრებლად ინგლისში უშვებენ, სადაც იგი ცნობილი დეტექტივი ხდება. ოციოდე წლის შემდეგ ის უბრუნდება ჩინეთ-იაპონიის ომის ქარცეცხლში გახვეულ შანხაის, რათა მშობლების გაუჩინარების საიდუმლო ამოხსნას. ეთნიკური მრავალფეროვნებით განთქმული ჩინური ქალაქის ფერადოვნება და დანისლული ლონდონი; ერების დიდი შეჯახება და კატასტროფის მომლოდინე მსოფლიოს ხვედრზე დაფიქრებული ადამიანები; მახეში მოქცეული კაცის არჩევანი და ვალის მოხდით მოგვრილი კმაყოფილება - იაპონური წარმოშობის ბრიტანელი მწერლის კიდევ ერთ შთამბეჭდავ ნაწარმოებში.

ფრენსის სკოტ ფიცჯერალდი - "ნაზია ღამე"

რომანის მოქმედება გასული საუკუნის 20-იან წლებში ვითარდება. ეს ის პერიოდია, როცა ამერიკა ჯაზის ეპოქას მოუცავს; როცა ამერიკელ ახალგაზრდათა ერთი ნაწილი ევროპაში ეძებს შვებას. ახალი, თავბრუდამხვევი ურთიერთობების ძიებაში კი მთავარს – ადამიანურ ღირებულებებს – ივიწყებენ.

ნიკოლას სპარქსი - "ჩემი საუკეთესო ნაწილი"

ამანდა კოლიერსა და დოუსონ ქოულს ერთმანეთი უსაზღვროდ უყვარდათ. ქალ-ვაჟი სხვადასხვა სამყაროს ეკუთვნოდა და მათი სიყვარული პატარა დაბა ორიენტალის ტრადიციებისთვის ნამდვილი გამოწვევა გახდა. სწორედ ამან დააშორა წყვილი.

და აი, 25 წლის შემდეგ, ამანდა და დოუსონი ორიენტალში ჩავიდნენ, რათა თავიანთი უფროსი მეგობრის, ტაკ ჰოსტეტლერის, დაკრძალვას დასწრებოდნენ. ვერც ერთმა ვერ შეძლო ისეთი ცხოვრების აწყობა, როგორზეც ოცნებობდნენ... პირველი სიყვარულის დავიწყება შეუძლებელი აღმოჩნდა...

და როდესაც ამანდა და დოუსონი ტაკის ანდერძის შესრულებას იწყებენ, ხვდებიან, რომ არც ტაკზე სცოდნიათ რამე, არც საკუთარ თავზე და არც ეს სამყარო ყოფილა ისეთი, როგორიც წარმოედგინათ, რომ ცხოვრებაში არასწორი არჩევანი გაუკეთებიათ. მხოლოდ ერთი რამ დარჩენილა უცვლელი ‒ მათი სიყვარული.

რომელ წიგნებზე ვრცელდება 35%-იანი ფასდაკლება ბიბლუსის მაღაზიათა ქსელში?

5 საჩუქარი, რომლითაც ნებისმიერ ბავშვს გაახარებთ

საქმიანი დღიური - წლის სწორად დაგეგმვის ალტერნატივა