ავიაკატასტროფა ყაზახეთში - სამგზავრო თვითმფრინავი, რომელშიც 100 ადამიანი იმყოფებოდა, შენობას შეეჯახა

ავიაკომპანია Bek Air-ის კუთვნილმა სამგზავრო თვითმფრინავმა, რომელშიც 95 მგზავრი და ეკიპაჟის 5 წევრი იმყოფებოდა, ყაზახეთის ქალაქ ალმაათთან კატასტროფა განიცადა, - ამის შესახებ ინფორმაციას „როიტერსი“ ავრცელებს.

სააგენტოს ცნობით, დაღუპულია სულ მცირე 14 ადამიანი, 22 ადამიანის ჯანმრთელობის მდგომარეობა მძიმეა.

გავრცელებული ინფორმაციით, თვითმფრინავი, რომელიც ალმაათიდან ნურ-სულთანში უნდა გაფრენილიყო, აფრენის მცდელობის დროს თავდაპირველად ბეტონის ღობეს, ხოლო შემდეგ ორსართულიან შენობას შეეჯახა.

ყაზახური ავიაკომპანია „ბეკ ეარი“, ჯერჯერობით მომხდარზე კომენტარს არ აკეთებს. საქმეზე მიმდინარეობს გამოძიება.