"ცოტა დრო გვჭირდება რეალობაში დასაბრუნებლად..." - რას წერს ვაჟა გაფრინდაშვილის ქალიშვილი მამის გათავისუფლების შემდეგ
ექიმ ვაჟა გაფრინდაშვილის ქალიშვილი მამის გათავისუფლების შემდეგ "ფეისბუქზე" პირველ კომენტარს აკეთებს. ირინა გაფრინდაშვილი მხარდაჭერისთვის ყველას მადლობას უხდის.
"ყველას უღრმესი მადლობა, ისეთ ემოციებში ვართ ვერ გპასუხობთ ყველას. საუკეთესო ხალხი ხართ, უღრმესი მადლობა მხარდაჭერისთვის. ცოტა დრო გვჭირდება რეალობაში დასაბრუნებლად! #ვაჟაექიმითავისუფალია" - წერს ირინა გაფრინდაშვილი.
ცნობისთვის, ცნობილი ექიმი-ტრავმატოლოგი ვაჟა გაფრინდაშვილი რამდენიმე საათის წინ გათავისუფლდა. იგი რუსეთის საოკუპაციო ძალების წარმომადგენლებმა 9 ნოემბერს, ახალგორის რაიონში დააკავეს. ექიმის ოჯახი ვარაუდობს, რომ ვაჟა გაფრინდაშვილს ახალგორში დაშავებული ადამიანისთვის დახმარების გაწევა სურდა.
დე ფაქტო ხელისუფლებამ ვაჟა გაფრინდაშვილს ე.წ. სახელმწიფო საზღვრის განზრახ დარღვევის ბრალდება წაუყენა რუსეთის სისხლის სამართლის კოდექსის 322-ე მუხლით, რომელიც ითვალისწინებს 200 000 რუბლით დაჯარიმებას, ორ წლამდე იძულებით სამუშაოებს, ან ორ წლამდე თავისუფლების აღკვეთას. ე.წ. ლენინგორის სასამართლომ ვაჟა გაფრინდაშვილს ორთვიანი წინასწარი პატიმრობა შეუფარდა.
ვაჟა გაფრინდაშვილი - წასვლის მიზეზი ავადმყოფის ნახვა იყო, რომლის სახელ-გვარსაც ვერ ვიტყვი
როგორ ეხმაურება მსოფლიო მედია ექიმ ვაჟა გაფრინდაშვილის გათავისუფლებას
