აფხაზეთის ე.წ. საპრეზიდენტო არჩევნებში ოპოზიციის კანდიდატი ასლან ბჟანია იქნება, ე.წ. პრეზიდენტის მოვალეობას კი ვალერი ბგანბა შეასრულებს
ოკუპირებული აფხაზეთის ე.წ. საპრეზიდენტო არჩევნებში, ოპოზიციის ლიდერი ასლან ბჟანია იყრის კენჭს. აფხაზური მედიის ცნობით, ამის შესახებ თავად ბჟანიამ განაცხადა.
ცოტა ხნის წინ, აფხაზეთის დე ფაქტო ვიცე-პრეზიდენტმა ასლან ბარციცმა განაცხადა, რომ რაულ ხაჯიმბა მომდევნო საპრეზიდენტო არჩევნებში საკუთარ კანდიდატურას აღარ წამოაყენებს.
ცნობისთვის, 2019 წლის სექტემბერში გამართულ არჩევნებში, ოპოზიციური პარტია „ამცახარას“ ლიდერი, ალხას კვიცინია მონაწილეობდა. მაშინ ე.წ. არჩევნებში მონაწილეობა ასლან ბჟანიას უნდა მიეღო, თუმცა ჯანმრთელობის მდგომარეობის მკვეთრად გაუარესების გამო, რასაც მისი მომხრეები მოწამვლას უკავშირებენ, ბჟანია რუსეთში ხანგრძლივ მკურნალობას გადიოდა. ოპოზიციის ლიდერი სოხუმში რამდენიმე დღის წინ, 9 იანვარს დაბრუნდა.
ოკუპირებული აფხაზეთის ე.წ. პარლამენტმა რაულ ხაჯიმბას გადადგომას მხარი დაუჭირა. ე.წ. ნაციონალური ასამბლეის დადგენილებით, პრეზიდენტის მოვალეობას თვითგამოცხადებული რესპუბლიკის პრემიერი ვალერი ბგანბა შეასრულებს. გადამდგარმა დე ფაქტო პრეზიდენტმა რაულ ხაჯიმბამ ე.წ. პარლამენტს 12 იანვარს განცხადებით მიმართა, რომ შეწყვეტილიყო მისი უფლებამოსილება, რასაც წინ უძღოდა ე.წ. უზენაესი სასამართლოს გადაწყვეტილება „საპრეზიდენტო არჩევნების ბათილად გამოცხადების შესახებ“.
ოკუპირებული აფხაზეთის ე.წ. ცენტრალური საარჩევნო კომისიის ცნობით, დე ფაქტო პრეზიდენტის არჩევნები 22 მარტს გაიმართება.
რაულ ხაჯიმბას "ადმინისტრაცია" განმეორებითი არჩევნების დანიშვნის შესახებ გადაწყვეტილებას გაასაჩივრებს
მიიღებს თუ არა ოკუპირებული აფხაზეთის დე ფაქტო საპრეზიდენტო არჩევნებში მონაწილეობას ასლან ბჟანია - ოპოზიციის ლიდერის კომენტარი
