ავტორი:

როგორ უნდა მოემზადოთ კორონავირუსისთვის? - პრაქტიკული რჩევები ამერიკელი ექიმებისგან

როგორ უნდა მოემზადოთ კორონავირუსისთვის? - პრაქტიკული რჩევები ამერიკელი ექიმებისგან

ახალი ტიპის კორონავირუსი გლობარულ საფრთხედ იქცა. საქართველოშიც უკვე გამოვლინდა ვირუსის პირველი შემთხვევა. ის აღმოაჩნდა საქართველოს მოქალაქეს, რომელიც ქვეყანაში ირანიდან აზერბაიჯანის გავლით შემოვიდა. პაციენტი ინფექციური საავადმყოფოს ბოქსირებულ განყოფილებაშია მოთავსებული.

კორონავირუსის შემთხვევები მსოფლიოს არაერთ ქვეყანაში გამოვლინდა. მათ შორის, აშშ-იც. ამერიკელი მედიკოსები ვარაუდობენ, რომ შესაძლოა, კორონავირუსით დაინფიცირებულთა რაოდენობა მნიშვნელოვნად გაიზარდოს, ამიტომაც, ისინი მოსახლეობას მზადყოფნისკენ მოუწოდებენ და პრაქტიკულ რჩევებსაც აძლევენ.

ვნახოთ, ამერიკელი ექიმებისა და ინფექციური დაავადებების ექსპერტთა რეკომენდაციები - როგორ მოვემზადოთ კორონავირუსისთვის?

როგორც ინფექციური დაავადებების ექსპერტები აღნიშნავენ, პირველ რიგში, აუცილებელია, არ ჩავარდეთ პანიკაში!

"ასეთ დროს მთავარი მანტრაა: იყავი მშვიდად და განაგრძე ცხოვრება" - ამბობს ბრაუნის უნივერსიტეტის ინფექციური დაავადებების ექსპერტი, ექიმი მარგარეტ ნილი.

"თუ დაინახავთ საზოგადოებრივ ტრანსპორტში, ან ნებისმიერ ადგილას თქვენს სიახლოვეს ადამიანს, რომელიც ახველებს, აცემინებს, აუცილებლად გაეცალეთ" - გვირჩევს ინფექციური დაავადებებისა და კორონავირუსის ექსპერტი, ექიმი სტენლი პერლმანი.

"თუ ვირუსის რაიმე სიმპტომს იგრძნობთ, არ წახვიდეთ სკოლაში, უნივერსიტეტში, სამსახურში და აუცილებლად დარჩით სახლში! ხშირად დაიბანეთ ხელები“, - ამბობს ინფექციური დაავადებების კიდევ ერთი ექსპერტი, ექიმი ტრიშ პერლი. მისივე თქმით, ხელების დაბანა ყველაზე ეფექტურია ვირუსის თავიდან ასარიდებლად. პერლი განმარტავს, რომ დაინფიცირების რისკს ხელების ხშირი დაბანა 30-დან 50 პროცენტამდე ამცირებს.

დეზინფექციისთვის კარგია ალკოჰოლი. გაწმინდეთ ალკოჰოლის შემცველი საშუალებით ნივთები, რომელსაც ეხებით. შეგიძლიათ ხელებზე წაისვათ ალკოჰოლის შემცველი ანტისეპტიკური საშუალებები.

ინფექციური დაავადებების სპეციალისტები რეკომენდაციას უწევენ გრიპის ვაქცინის გაკეთებას. ასევე, ხანშიშესულ ადამიანებს ურჩევენ პნევმონიისთვის განკუთვნილი ვაქცინის გაკეთებასაც. აქვე აღნიშნავენ, რომ ეს ვაქცინები არ ამცირებენ კორონავირუსით დაინფიცირების რისკს, მაგრამ მათი საშუალებით გრიპის ვირუსს აარიდებთ თავს და კლინიკების რესურსი კორონავირუსით ინფიცირებულებს მოხმარდებათ.

ბოლო ინფორმაციით, გლობალური მასშტაბით, კორონავირუსით გარდაცვლილთა რიცხვმა 2 750-ს გადააჭარბა. ვირუსი უკვე მსოფლიოს 35-ზე მეტ ქვეყანაში გავრცელდა.

მართვის მოწმობის მისაღები თეორიული და პრაქტიკული გამოცდები დროებით უქმდება

დარჩით სახლში და გაუფრთხილდით თავს!

"მე ვრჩები სამსახურში შენთვის, შენ დარჩი სახლში ჩვენთვის" - ქართველი ექიმების კამპანია "ფეისბუქზე"