წვიმა, მაღალმთაში თოვლი, ზღვაზე შტორმი - უახლოეს დღეებში საქართველოში ამინდი უარესდება

მარტის პირველ დღეებში საქართველოს მასშტაბით ამინდები უარესდება.

გარემოს ეროვნული სააგენტოს ინფორმაციით, 29 თებერვალს დღის ბოლოდან 2 მარტამდე საქართველოში მოსალოდნელია წვიმა, მაღალმთაში თოვლი, ზოგან ძლიერი, შესაძლებელია ნისლი და ქარბუქი, ზღვაზე 4-5 ბალიანი შტორმი. დროგამოშვებით იქროლებს დასავლეთის მიმართულების ძლიერი ქარი.

სინოპტიკოსების პროგნოზით, მთიან რეგიონებში ჰაერის ტემპერატურის მოსალოდნელი მატებით გამოწვეულმა თოვლის დნობამ და თანდართულმა ძლიერმა ნალექებმა დასავლეთ საქართველოს მდინარეებზე, შესაძლებელია, წყლის დონის მნიშვნელოვანი მატება გამოიწვიოს, პატარა მდინარეებზე კი წყალმოვარდნებია მოსალოდნელი. ასევე მთიან ზონებში ზვავების ფორმირება და მეწყრული პროცესების ჩასახვა - გააქტიურებაა ნავარაუდევი.