კორონავირუსის საფრთხის გამო, თბილისის თეატრები სპექტაკლების ჩვენებას აჩერებენ

თბილისის თეატრები 16 მარტამდე სპექტაკლების ჩვენებას აჩერებს. როგორც "ინტერპრესნიუსს“საქართველოს განათლების, მეცნიერების, კულტურისა და სპორტის სამინისტროში განუცხადეს, თეატრებს შესაბამისი რეკომენდაციით ჯანდაცვის სამინისტრომ მიმართა.

მათივე ინფორმაციით, აღნიშნულ პერიოდში თეატრებში შესაბამისი სადეზინფექციო სამუშაოები ჩატარდება.

“ჯანდაცვის სამინისტროდან უკვე მოვიდა რეკომენდაცია. ვამზადებთ წერილს, რომელიც ყველა თეატრსა და შესაბამის სიპებს გაეგზავნებათ. 16 მარტამდე თუკი რამე წარმოდგენა იყო დაგეგმილი, ყველაფერი გადაიდება. რეკომენდაცია არის, რომ დეზინფექცია ჩატარდეს“, - ამბობენ სამინისტროში.

შეგახსენებთ, რომ რეკომენდაცია ახალი კორონავირუსის გავრცელებასთან დაკავშირებული პრევენციული ღონისძიებების ფარგლებში გაიცა.