ირანის ლიდერის მრჩეველი კორონავირუსით გარდაიცვალა - "ტრამპო, მოხსენი წყეული სანქციები, რომ ვირუსს გავუმკლავდეთ"

ირანის უმაღლესი ლიდერის მრჩეველთა საბჭოს წევრი კორონავირუსით გარდაიცვალა. ინფორმაციას "ესოშიეითიდ პრესი“ ადგილობრივ მედიაზე დაყრდნობით ავრცელებს. მუჰამედ მირმოჰამადი 71 წლის იყო.

ექსპერტების ინფორმაციით, კორონავირუსით გარდაცვალების მაჩვენებელი ირანში 5.5.%-ია, რაც მნიშვნელოვნად აღემატება სხვა ქვეყნებში არსებულ მონაცემებს. ამასთან, როგორც ცნობილია ქვეყნიდან საკუთარი დიპლომატების ევაკუაცია დაიწყო დიდმა ბრიტანეთმა. გავრცელებული ცნობებით, ირანიდან თავიანთი მოქალაქეების გაყვანას სხვა ქვეყნებიც გეგმავენ.

ამასთან, ირანი ქვეყანაში კორონავირუსის ეპიდემიის ფონზე აშშ-ს სთხოვს, სანქციები მოუხსნას. ამის შესახებ ირანის პრეზიდენტის მრჩეველმა, ხესამედინ აშენამ დონალდ ტრამპს "ტვიტერის“ პირადი გვერდიდან მიმართა.

"დონალდ ტრამპ, ვერ ხვდები, რომ კორონავირუსი საერთაშორისო პრობლემაა? რაც მეტად გავრცელდება ის აქ, მეტად გავრცელდება იქაც. ნუ დაელოდები მოპატიჟებას, რომ დაგვეხმარო ვირუსის შეკავებაში, მოხსენი ეს დაწყევლილი სანქციები, რომ შევძლოთ მასთან გამკლავება“, - წერს პრეზიდენტის მრჩეველი სოციალურ ქსელში.

ცნობისთვის, ოფიციალური ცნობებით, ირანში კორონავირუსით 1000-მდე ადამიანია ინფიცირებული, ხოლო დაღუპულთა რიცხვმა 50-ს გადააჭარბა.

არაოფიციალური ცნობებით კი, ვითარება ქვეყანაში საგანგაშოა და დაღუპულთა და დაინფიცირებულთა რიცხვი ოფიციალურ მონაცემებს მკვეთრად აღემატება. BBC გასულ შაბათს წყაროზე დაყრდნობით წერდა, რომ ირანში ვირუსმა 210 ადამიანი იმსხვერპლა.