"ერთ-ერთის მდგომარეობა საშუალოზე მძიმეა" - ბოლო ინფორმაცია კორონავირუსით დაინფიცირებული პირების მდგომარეობაზე

ინფექციური საავადმყოფოს სამედიცინო დირექტორის მარინა ეზუგბაიას ინფორმაციით, ახალი კორონავირუსით ინფიცირებული 10 პირიდან ერთ-ერთის მდგომარეობა კვლავ საშუალოზე მძიმეა.

„ამ 10 პაციენტიდან მხოლოდ და მხოლოდ ერთი პირის მდგომარეობა არის საშუალოზე მძიმე, თუმცა მისი მდგომარეობაც სტაბილურია. ცხელება უგრძელდება ჯერჯერობით, მაგრამ ჩივილები მინიმალურად აქვს გამოხატული. გრძელდება მეთვალყურეობა. კლინიკო-ლაბორატორიული მონაცემების შეფასებით, მდგომარეობა სტაბილურია და შემოსვლის შემდეგ პროგრესირებას არ განიცდის“, - განაცხადა ეზუგბაიამ.

საქართველოში კორონავირუსით დაინფიცირებული ადამიანების რაოდენობა 12-მდე გაიზარდა. ამის შესახებ ინფორმაცია stopcov.gov.ge-ზე ვრცელდება. ამ დროისთვის კარანტინის რეჟიმში 140 ადამიანი იმყოფება, ხოლო სტაციონალური მეთვალყურეობის ქვეშ 42.