როგორია ამირან გამყრელიძის შვილის ჯანმრთელობის მდგომარეობა - თენგიზ ცერცვაძის კომენტარი

ინფექციური საავადმყოფოს დირექტორის თენგიზ ცერცვაძის განცხადებით, დაავადებათა კონტროლის ცენტრის ხელმძღვანელის, ამირან გამყრელიძის შვილის, ნიკოლოზ გამყრელიძის ჯანმრთელობის მდგომარეობა, რომელსაც კორონავირუსული ინფექცია დაუდგინდა, სტაბილურია.

როგორც ჟურნალისტებთან საუბარში თენგიზ ცერცვაძემ აღნიშნა, ნიკოლოზ გამყრელიძემ მაღალი მოქალაქეობრივი შეგნება გამოიჩინა და საავადმყოფოს თავად მიაკითხა.

"მისი ჯანმრთელობის მდგომარეობა დამაკმაყოფილებელია, აქვს მინიმალური სიმპტომები, ტემპერატურა 37. 3. სხვა გადახრები მას არ აღენიშნება. ის თავად მოვიდა აქ, მაღალი მოქალაქეობრივი შეგნება გამოიჩინა, ასე უნდა იქცეოდეს ყველა", - განაცხადა ცერცვაძემ.

ცნობისთვის, საქართველოში კორონავირუსის მე-13 შემთხვევა დაფიქსირდა. დაავადებათა კონტროლის ეროვნული ცენტრის ხელმძღვანელის ამირან გამყრელიძის ინფორმაციით, ინფიცირებული შემთხვევებიდან უმრავლესობა უკავშირდება იტალიასთან პირდაპირ ან ირიბ კონტაქტს და ორია დაკავშირებული ირანში მოგზაურობის ისტორიასთან.

დაინფიცირებულებს შორის ამირან გამყრლიძის შვილიცაა. როგორც ცნობილია, ნიკოლოზ გამყრელიძე სამედიცინო ცენტრ "ევექსის" სამეთვალყურეო საბჭოს თანამშრომელია. ერთ-ერთი დაინფიცირებული სწორედ "ევექსის" სათაო ოფისში მომუშავე პირია.

• წაიკითხეთ: "ინფექციამ არ იცის ვინ ვისი შვილია" - ამირან გამყრელიძის კომენტარი შვილის მდგომარეობაზე