გიორგი ვაშაძე ოპოზიციისა და ხელისუფლების შეთანხმების ახალ დეტალებს ამხელს

"ახალი საქართველოს" ლიდერმა გიორგი ვაშაძემ იმ დეტალებზე ისაუბრა, რაზეც ოპოზიცია და ხელისუფლება 8 მარტს შეთანხმდა. საქმე ეხება პოლიტპატიმრების საკითხს და საპროტესტო აქციების შეწყვეტას.

ვაშაძის თქმით, ხელისუფლებასთან მიღწეული შეთანხმებით, გიგი უგულავამ სასჯელაღსრულების დაწესებულება პრეზიდენტის შეწყალების საფუძველზე უნდა დატოვოს. მისივე განმარტებით, ხელისუფლებასთან მიღწეულ შეთანხმებაში საუბარიაირაკლი ოქრუაშვილის, გიორგი რურუას და ბესიკ თამლიანის საკითხზეც, რომელთა გასათავისუფლებლად განსხვავებული მექანიზმი უნდა ამოქმედდეს, მათ შორის აღკვეთის ღონისძიების შეცვლა.

"როგორც შეხვედრაზე შესვლამდე, ასევე შეხვედრის დროს, ერთ-ერთი მთავარი პირობა ჩვენგან იყო სწორედ პოლიტიკური დევნის შეწყვეტა და პოლიტპატიმრების გათავისუფლება. შეიძლება ვერ ვთანხმდებით „ქართულ ოცნებასთან“ და ისინი ამათ არ ეძახიან პოლიტპატიმრებს, მაგრამ მეორე დოკუმენტს, რომელსაც ხელი მოვაწერეთ, მითითებულია პრეზიდენტის ჩართულობის შესახებ.

ეს დოკუმენტი ხელმოწერილია იმისთვის, რომ გამოყენებული იქნას მექანიზმები, რომ პოლიტპატიმრები გათავისუფლდნენ საპატიმრო დაწესებულებებიდან.

ღიად ვიტყვი, აქ საუბარია თამლიანზე, რურუაზე, ოქრუაშვილზე, როგორც 20 ივნისის შემდგომ პატიმრობაში მყოფ ადამიანებზე (მათ აღკვეთის ღონისძიების სახით წინასწარი პატიმრობა აქვთ), მეორე მხრივ, საუბარია გიგი უგულავაზე. პრეზიდენტის ინსტიტუცის მექანიზმი უნდ იქნას გამოყენებული საბოლოო შეთანხმების ჩამოსაყალიბებლად, რომ გიგი უგულავამ დატოვოს საპატიმრო დაწესებულება.

ფორმალურად და პროცედურულად შეიძლება ამას შეწყალება ერქვას, თუმცა რეალური შეწყალებისგან ჩვენ ვამბობთ, რომ ძალიან შორს არის" - განაცხადა გიორგი ვაშაძემ.

მისი თქმით, აქვს მოლოდინი, რომ თამლიანთან, ოქრუაშვილსა და რურუასთან დაკავშირებით გადაწყვეტილება ახლო მომავალში იქნება მიღებული, გიგი უგულავას საკითხზე კი პრეზიდენტმა უნდა განსაზღვროს, რა დრო დასჭირდება.

კიდევ ერთი საკითხი, რომელიც ოპოზიცია-ხელისუფლების შეთანხმებაში შევიდა არის ის, რომ ოპოზიციური პარტიები მთავრობის წინააღმდეგ აქციებს წყვეტენ.

ამის შესახებ ვაშაძემ ტელეკომპანია "პალიტრანიუსის" გადაცემა Newsroom-ის ეთერში განაცხადა. მისი თქმით, თუ მმართველი გუნდისა და ოპოზიციის წარმომადგენლებს შორის შეთანხმება შესრულდება, წინასაარჩევნო კამპანია დაიწყება.

"დღეს გვექნება შეხვედრა და სავარაუდოდ, აქციებზე მორატორიუმს გამოვაცხადებთ. ღმერთმა ნუ ქნას და თუ მოტყუებას აქვს ისევ ადგილი, გვესმის რა მოგვიწევს ხომ?!

თუ შესრულდება, მაშინ საარჩევნო კამპანია იქნება. ჩვენი თვითმიზანი კი არაა პიკეტირება და ქუჩაში დგომა. ეს არ იყო ცალმხრივი დათმობა. ჩვენ სრულად პროპორციულს ველოდებოდით და ჩვენი მხრიდან ისიც კომპრომისია, რომ 30 მაჟორიტარული ოლქი იქნება მხოლოდ" - განაცხადა ვაშაძემ.

შეგახსენებთ, ხელისუფლება და ოპოზიცია საარჩევნო სისტემასთან დაკავშირებით 8 მარტს შეთანხმდა. ხელმოწერილი მემორანდუმის თანახმად, 2020-ის საპარლამენტო არჩევნები შემდეგი პრინციპით ჩატარდება: 120/30-ზე, რაც 120 პროპორციულ და 30 მაჟორიტარულ მანდატს ითვალისწინებს; გარდა ამისა, საარჩევნო ბარიერი 1% იქნება, ასევე მემორანდუმის თანახმად წესდება 40%-იანი ჩამკეტი, რომლის თანახმადაც, პარტია, რომელიც 40%-ზე ნაკლებ მხარდაჭერას მოიპოვებს, უმრავლესობას ვერ მიიღებს და მთავრობას ვერ დააკომპლექტებს.