ანიტა ფაცაციას ოჯახმა "ანიტას ფონდი" დააფუძნა - "გვინდა, მისი სახელით დაწყებული სიკეთე და სიყვარული არასდროს დავამთავროთ..."
რამდენიმე თვის წინ, 2 წლის ანიტა ფაცაციას გადასარჩენად მთელი საქართველო გაერთიანდა. სამწუხაროდ, პატარა გოგონას გადარჩენა ვერ მოხერხდა - ანიტა უმძიმეს დაავადებასთან (ბავშვს დილატაციური კარდიომიოპათია დაუდგინეს. მას ესაჭიროებოდა მსოფლიოში ერთ-ერთი ურთულესი ოპერაცია - გულის გადანერგვა) ბრძოლაში 31 იანვარს დამარცხდა...
ბავშვის დედის, მარიკო სადრაძის ინიციატივით, 9 მარტს ოფიციალურად დაფუძნდა ანიტას სახელობის ფონდი, რომელიც ჯანმრთელობის პრობლემების მქონე ნებისმიერი ასაკის ადამიანს დაეხმარება. საქველმოქმედო ფონდს ანიტას ოჯახი უხელმძღვანელებს.
"საზოგადოების დიდი მოთხოვნიდან და ნდობიდან გამომდინარე, გადავწყვიტეთ უკვე ოფიციალურად განვაცხადოთ ფონდის საქმიანობის დაწყების შესახებ. მთელი საქართველო, ადამიანები გვთხოვდნენ რომ აქტიურად ჩავრთულიყავით ადამიანების დახმარებაში, მიუხედავად მათი ასაკისა და გვინდა ისინი გავახაროთ, ვუთხრათ რომ უკვე დავიწყეთ და არასდროს არ გავჩერდებით" - ამბობს "ანიტას ფონდის" ერთ-ერთი თანამშრომელი ნათია პაპიძე.
ანიტას დედა, მარიკო სადრაძე, საზოგადოებას სთხოვს რომ სიკეთის კეთებაში ხელი შეუწყონ.
"გადავწყვიტეთ მოგვეწყო პატარა და ფერადი საღამო ანიტას მოსაგონებლად. "ანიტას ფონდი" დავარეგისტრირეთ უკვე და გადაწყვეტილი გვაქვს ანიტას სახელით დაწყებული სიკეთე, სიყვარული არასდროს არ დავამთავროთ და ამაში ძალიან გვჭირდება ქართველი ერის თანადგომა“ - ამბობს მარიკო სადრაძე.
ფონდის ოფიციალურად დაფუძნება ოჯახმა სიმბოლურად ანიტას გარდაცვალებიდან 40 დღის გასვლას დაუკავშირა. საღამო, სადაც ფონდის დაფუძნება ოფიციალურად გააჟღერეს, ძალიან ემოციური გამოდგა. განსაკუთრებით კი იმ მომენტში, როცა ანიტას ვიდეოების 10-წუთიანი კოლაჟი აჩვენეს. საღამო საათნახევრის განმავლობაში გრძელდებოდა. ბოლოს კი ჰაერში ანთებული სანათები გაუშვეს.
ავტორი: თიკო გურაშვილი
"ბავშვის დაინფიცირება, სავარაუდოდ, იტალიაში კონტაქტს და კორონავირუსის ნომერ მეორე შემთხვევასთან ნაცნობობას უკავშირდება" - ცერცვაძე
საქართველოში 12 წლის ბავშვს კორონავირუსი დაუდგინდა
