დიზაინერმა ნინა ზარქუამ კორონავირუსთან დაკავშირებული ვითარების გამო, ბიუჯეტს 10 ათასი დოლარი შესწირა

ქართველმა დიზაინერმა და ბრენდ Nina Zarqua collection-ის დამფუძნებელმა ნინა ზარქუამ კორონავირუსთან დაკავშირებული ვითარების გათვალისწინებით სახელმწიფო ბიუჯეტს 10 ათასი დოლარი შესწირა.

დიზიანერის თქმით კორონავირუსმა კერძო ბიზნესსაც შეუქმნა პრობლემები. პირადად მას მომხმარებლისა და მომუშავე პერსონალის ჯანმრთელობის დაცვის მიზნით მაღაზიის დახურვაც მოუხდა. თუმცა ზარქუა ფიქრობს, რომ ახლა ქვეყანაში და ზოგადად მსოფლიოში შექმნილი ვითარების გამო, ნებისმიერი პირი საკუთარ პირად ინტერესებზე მაღლა უნდა დადგეს და საზოგადოების იმ ფენის დასახმარებლად უნდა გაერთიანდეს, რომელიც ვირუსმა ყველაზე მეტად დააზარალა.

დიზიანიერი არ გამორიცხავს, რომ მოვლენების განვითარებიდან გამომდინარე სახელმწიფოს კიდევ რამდენჯერმე გაუწოდოს დახმარების ხელი.

"Nina Zarqua collection“ის დამფუძნებელი ანალოგიური აქციისკენ მოუწოდებს მოდის ინდუსტრიის წარმომადგენლებს, რომელთაც აქვთ შესაძლებლობა მცირედით მაინც დაეხმარონ სოციალურად დაუცველ ფენას.

აქვე გეტყვით, რომ ეს დიზიანერის პირველი საქველმოქმედო აქცია არ არის, ის დაბადების დღეებს კათარზისში ბენეფიციარებთან ერთად იხდის და დღესასწაულს საკუთარ დაბადების დღეზე მოხუცებს უწყობს.

ყოფილი მოდელი ნინა ზარქუა აქსესუარების, ფეხსაცმელების, ჩანთებისა და სამკაულის ხაზზე მუშაობს, რომელიც მსოფლიოს სხვადასხვა ქვეყანაში იყიდება. ქართველი დიზაინერის სახელი დიდი ხანია გასცდა საქართველოს ფარგლებს. 2019 წელს, მუსიკალურ ფესტივალზე Coachella Valley Music and Arts-ზე ცნობილი ამერიკელი ტოპ-მოდელი კენდალ ჯენერი, სწორედ ზარქუას შექმნილი ბრჭყვიალა ფეხსაცმლით წარსდგა.