"ჯანმრთელად ჩათვალეს თავი და არ დაემორჩილნენ თვითიზოლაციის წესს" - პოლიციამ იძულების წესით 2 პირი კარანტინში გადაიყვანა

ფოთიდან, თვითიზოლაციის წესების დარღვევისთვის იძულებით ბათუმში, საკარანტინო სივრცეში 2 ადამიანი გადაიყვანეს.

საზოგადოებრივი ჯანდაცვის ცენტრის ინფორმაციით, მათ გერმანიაში მოგზაურობის ისტორია აქვთ, ერთი ოჯახის წევრები არიან და თვითიზოლაციის რეჟიმში 10 დღე იმყოფებოდნენ.

"ესენი არიან გერმანიიდან ჩამოსულები, ორი პიროვნება ერთი ოჯახიდან, რომლებმაც დაარღვიეს თვითიზოლაციის პირობები. ისინი გარეთ საპატრულო პოლიციამ აღმოაჩინა და საგანგებო სიტუაციების მართვის ჯგუფმა გადაიყვანა ბათუმში, საკარანტინო სივრცეში.

ისინი 10 დღე იმყოფებოდნენ თვითიზოლაციის რეჟიმში, რადგან თავს კარგად გრძნობენ, ჯანმრთელად ჩათვალეს თავი და არ დაემორჩილნენ თვითიზოლაციის წესს“ , - განაცხადა ფოთის საზოგადოებრივი ჯანდაცვის უფროსის მოადგილემ, ზინაიდა გაგუამ.