დამანგრეველი მიწისძვრა ხორვატიაში და უსახლკაროდ დარჩენილი ადამიანები - უმძიმესი ფოტოები ზაგრებიდან

ხორვატიაში დღეს დილით, ადგილობრივი დროით 6:23 წუთზე მიწისძვრა მომხდა. მიწისქვეშა ბიძგების სიმძლავრემ 5.3 მაგნიტუდა შეადგინა, რაც ქვეყნის დედაქალაქის, ზაგრების ჩრდილოეთ ნაწილისთვის დამანგრეველი აღმოჩნდა. ამის შესახებ სააგენტო „როიტერსი“ წერს. მიწისძვრის ხანგრძლივობა 10 წამი იყო. უამრავი ადამიანი ღია ცის ქვეშ დარჩა. მიწისძვრამ ნგრევის გარდა, ხანძრებიც გამოიწვია.

„როიტერსის“ ცნობით მიწისძვრა 15 წლის მოზარდი ემსხვერპლა. დაშავებულების რაოდენობის შესახებ ზუსტი ინფორმაცია ჯერჯერობით უცნობია.

ხორვატიის შინაგან საქმეთა მინისტრი დავორ ბოზინოვიჩი „ტვიტერის“ პირად გვერდის საშუალებით მოუწოდებს ქუჩაში დარჩენილ ადამიანებს, რომ ერთმანეთისგან დისტანცია დაიცვან, რათა კორონავირუსი კიდევ უფრო მეტად არ გავრცელდეს. ამ დროისთვის ქვეყანაში COVID-19-ით 206 ადამიანია ინფიცირებული და მათ შორის ერთი გარდაიცვალა.