უკრაინელი დეპუტატი საკუთარ ოფისში გარდაცვლილი იპოვეს

უკრაინელი დეპუტატი, ვალერი დავიდენკო საკუთარ ოფისში გარდაცვლილი იპოვეს. უკრაინის შინაგან საქმეთა მინისტრის მოადგილის, ანტონ გერაშენკოს ინფორმაციით, პოლიტიკოსი თავში გასროლით არის მოკლული. მისივე თქმით, იარაღი ცხედართან აღმოაჩინეს.

მედიის ინფორმაციით, ერთ-ერთ ვერსიად განიხილება თვითმკვლელობაც.

უკრაინის პოლიციის ინფორმაციით, 47 წლის დეპუტატის ცხედარი ოფისის საპირფარეშოში დამლაგებელმა იპოვა.

"18:37 საათზე ქალმა შეატყობინა პოლიციას შემთხვევის შესახებ. ადგილზე მუშაობს საგამოძიებო-ოპერატიული ჯგუფი და კრიმინალისტები" - ნათქვამია პოლიციის განცხადებაში.

ცნობისთვის, დავიდენკო უმაღლესი რადას წევრი 2014 წლიდან არის. ის საკანონმდებლო ორგანოს ეკონომიკური განვითარების კომიტეტის წევრი იყო.