მარნეულსა და ბოლნისში კარანტინი გამოცხადდა

საქართველოს მთავრობის ადმინისტრაციაში საკონსულტაციო საბჭოს წევრების შეხვედრა დასრულდა, სადაც კორონავირუსთან დაკავშირებით ქვეყანაში შექმნილ სიტუაციაზე იმსჯელეს.

"რთული შემთხვევა დაფიქსირდა მარნეულში, ქალბატონის ინფიცირების წყაროს დადგენა ვერ მოხერხდა. ასეთი შემთხვევისთვის ვემზადებოდით, რომ დაიწყებოდა შიდა გადაცემის ეტაპი. ჩვენი მომზადების მიუხედავად სიტუაცია რთულია და მოგვიწია მარნეულის და ბოლნისის რაიონების გადაყვანა მკაცრ საკარანტინო რეჟიმზე" - განაცხადა პრემიერ-მინისტრმა გიორგი გახარიამ სხდომის დასრულების შემდეგ.

პრემიერის თქმით, ინფიცირებული ადამიანი წლისთავზე იმყოფებოდა და შესაბამისად, ათეულობით სხვა ადამიანთან ჰქონდა ურთიერთობა როგორც მარნეულის, ისე ბოლნისის მუნიციპალიტეტებიდან.

მისივე თქმით, მკაცრ საკარანტინო რეჟიმზე გადასვლა სამართლებრივად ნიშნავს შემდეგს:

• დღეიდან მარნეულის და ბოლნისის მუნიციპალიტეტებში იზღუდება შესვლა-გამოსვლა
• იხურება ყველა ობიექტი, ხელმისაწვდომი იქნება მხოლოდ მედიკამენდების, საკვების და კრიტიკული ინფრასტრუქტურის ობიექტები
• საზოგადოებრივი ტრანსპორტის მოძრაობა შეიზღუდება
• მუნიციპალიტეტის შიგნით იზღუდება გადაადგილება, გარდა იმ შემთხვევებისა, როცა მცხოვრებლები გადაადგილდებიან საკვები პროდუქტებისა და მედიკამენტების შესაძენად, ან სამედიცინო მომსახურეობის მისაღებად
• ასევე, ჩვენ დავუშვით გამონაკლისი და იმ შემთხვევაში, როდესაც გვექნება მედიკოსების მიერ მკაფიოდ გაწერილი პროტოკოლის მიხედვით შესაძლებლობა, მარნეულის და ბოლნისის მცხოვრებლებს მივცეთ სასოფლო სამეურნეო სამუშაოების ჩატარების საშუალება
• მუნიციპალიტეტის ტერიტორიაზე საზოგადოებრივ წესრიგს დაიცავს და საგანგებო რეჟიმს უზრუნველყოფს შსს

საქართველოს პრემიერ-მინისტრის განცხადებით, მარნეულსა და ბოლნისის მუნიციპალიტეტებში გაიგზავნა სამართალდამცველებისა და მედიკოსების სპეციალური ჯგუფები, ასევე ჯგუფები, რომლებიც ამ მუნიციპალიტეტებს პროდუქტით მოამარაგებს.

როგორც გახარიამ მთავრობის ადმინისტრაციაში გამართულ სპეციალურ ბრიფინგზე განაცხადა, მარნეულისა და ბოლნისის მოსახლეობას ადგილობრვი ხელისუფლების წარმომადგენლები და უბნის ექიმები გაუწევენ ზედამხედველობას.

პრემიერის ინფორმაციითვე, „ჯანდაცვის სამინისტროს დაევალა მარნეულისა და ბოლნისის მუნიციპალიტეტებში ტესტირების სპეციალური პროგრამა დაიწყოს“.