კლინიკაში მოთავსებული 2 ჩვილის მდგომარეობა სტაბილურად მძიმეა, ერთის კი უკეთესი - ლალი ტურძელაძე პაციენტების მდგომარეობაზე

თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის კლინიკური დირექტორის ლალი ტურძელაძის ინფორმაციით, კორონავირუსით ინფიცირებულ 3 პაციენტს ჩივილები აღარ აქვთ და არც პნევმონია აღენიშნებათ.

მისივე თქმით, ელოდებიან 14 დღის გასვლას, რომ კორონავირუსზე ტესტი ჩაუტარონ.

„3 პაციენტის მდგომარეობა არის კარგი, მათ ჩივილი აღარ აქვთ, ტემპერატურა არ აღენიშნებათ, მოსმენით ფილტვებში პნევმონია აღარ აქვთ, სუნთქვის უკმარისობაც მოეხსნათ, ანუ, მდგომარეობა დამაკმაყოფილებელია, ველოდებით 14 დღის გასვლას, რომ გავუკეთოთ ტესტი“, - განაცხადა ლალი ტურძელაძემ.

ტურძელაძის ინფორმაციით, ამ დროისთვის მის კლინიკაში კორონავირუსით ინფიცირებული 15 პაციენტია, რომელთაგან 2 მართვით სუნთქვაზე იმყოფება.

„ამჟამად ჩვენს კლინიკაში მოთავსებულია 69 პაციენტი, აქედან არის 15 დადასტურებული. 15-დან 2 არის რეანიმაციაში, აპარატულ სუნთქვაზე, მათი მგდომარეობა არის სტაბილურად მძიმე, თუმცა ვიტალური ფუნქციები შენარჩუნებული აქვს და იმედი გვაქვს, მათი გამოჯანმრთელების. 3 ჩვილის მდგომარეობა სტაბილურია, პირველის მდგომარეობა უკეთესია, ხოლო დანარჩენი ორის - სტაბილურად მძიმე“, - განაცხადა ტურძელაძემ.

ცნობისთვის, ამ დროისთვის საქართველოში კორონავირუსით დაინფიცირების 90 დადასტურებული შემთხვევა ფიქსირდება. მათგან 18 გამოჯანმრთელდა. კარანტინის რეჟიმში 4717 ადამიანი იმყოფება, ხოლო სტაციონარში მეთვალყურეობის ქვეშ - 268 პირია.