"სუფთა სახლის" მაღაზიები დროებით იხურება - კომპანიის განცხადება

მაღაზიათა ქსელ "სუფთა სახლი" დროებით ფუნქციონირებას წყვეტს. აღნიშნულის შესახებ მათ მიერ გავრცელებულ განცხადებაშია აღნიშნული.

"ძვირფასო მომხარებლებო, ქვეყანაში არსებული საგანგებო მდგომარეობიდან გამომდინარე, საქართველოს მთავრობის დადგენილების თანახმად, მაღაზიათა ქსელი "სუფთა სახლი" სამწუხაროდ დროებით ვერ განაგრძობს ფუნქციონირებას. გვინდა მადლობა გადავუხადოთ ჩვენს ერთგულ მომხმარებლებს. დიდი სურვილი გვქონდა გაგვეგრძელებინა თქვენი მომსახურება, რათა შეუზღუდავად მოგვეწოდებინა პირველადი მოხმარების პროდუქცია, რომელიც ამ პერიოდისათვის კრიტიკულად საჭირო და მნიშვნელოვანია.

"სუფთა სახლი" მთელი ამ დროის განმვალობაში ზედმიწევნით იცავდა, როგორც სახელმწიფოს მოთხოვნებს, ასევე ჯანდაცვის მსოფლიო ორგანიზაციის მიერ გაწეულ რეკომენდაციებს და ყველა შესაბამის პირობას უქმნიდა თავის თანამშრომლებს.

ასევე მადლობას ვუხდით "სუფთა სახლის" თითოეულ თანამშრომელს, რომელიც მიუხედავად არსებული მაღალი რისკებისა, მზად იყო ბოლომდე დარჩენილიყო მომხმარებლის სამსახურში. იმ პერიოდში როცა მათ ეს ყველაზე მეტად სჭირდებოდათ. ვიმედოვნებთ, რომ ძალიან მალე გვექნება შესაძლებლობა დავბრუნდეთ თქვენს სამსახურში" - ნათქვამია განცხადებაში.

ცნობისთვის, "სუფთა სახლის" ხელმძღვანელობამ გაავრცელა ინფორმაცია, რომ თემქის დასახლებაში მდებარე ფილიალის ყველა თანამშრომელი თვითიზოლაციაში გაუშვეს და ისინი დროებით ახალი კადრებით ჩაანაცვლეს.

თუმცა რა გახდა ფილიალის თანამშრომლების იზოლაციაში გაშვების მიზეზი არ დააკონკრეტეს. გავრცელებული ინფორმაციით კი, ამ ფილიალის ერთ-ერთი კონსულტანტის ოჯახის წევრს კორონავირუსი დაუდასტურდა.